Kut noh ka “Meghalaya Youth Exchange Programme 2023” ba la pynlong da ka Tnat DSYA

Syllad | The Rising MeghalayaOctober 20, 2023

Ka “Meghalaya Youth Exchange Programme 2023” ba la khot pynlong da ka Tnat Directorate of Sports & Youth Affairs kaba la sdang naduh ka 16 tarik mynta u bnai ka la kut noh haka sngi Thohdieng lyngba ka jingwan iashim bynta jong kumba 700 ngut ki samla na baroh ki 12 ki district ka jylla.

Ia kane ka jingialang pynhap pyrda la pynlong hapoh Convocation Hall, NEHU Campus Mawkynroh, Shillong ha ka jingiadon lang u Bah Shakliar Warjri, Myntri ka Tnat Sports & Youth Affairs kum u Kongsan nalor ka Kong  I. Laloo, Director of Sports & Youth Affairs bad kiwei kiwei.

Haba kren ha ka jingialang, u Bah Shakliar Warjri u la pynpaw ia ka jingkmen ban sakhi ia ka jingthrang bad halor ka jingdonkam jong ki samla ban lah ban pynpaw ia la ki jong ki sap ki phong lyngba kane ka prokram.

U la kyntu ia ki nongiashim bynta ba kin shim kabu lyngba kum kine ki rynsan ba kin ioh jingtip bad ban kyntiew shuh shuh ia la ki jong ki sap ki phong bad ruh ban tip ha kaba iadei bad ki kolshor bapher bapher hapdeng ki jaidbynriew ha ka jylla.

Nalor kata u Myntri u la pynpaw ruh halor kiba bun ki sienjam ba la shim da ka sorkar kiba thmu ban kyntiew ia ki sap ki phong jong ki samla ka jylla bad ruh ha kaba iadei bad ka jinglong jingman jong ka jingim hapdeng ki nongshong shnong hi baroh.

Ha kane ka jingrakhe kaba shitaiew kynthih la pynlong ia ki prokram bapher bapher naduh ka jingiakop rwai tynrai, shad tynrai, iakop tem koitar, jingput ktien, tyrko nia, One-Act Play halor ka mat “Mission Life,” Talent Hunt bad kiwei kiwei.

Na ka liang u Kongsan bad kiwei pat ki heh kiba la wan iashim bynta ki la sam ruh ia ki khusnam bad ki syrnot sha ki nongjop ha ki jingiakop bapher bapher.