Kut noh ka prokram ba jan shi bnai ka ophis BDO Mawryngkneng halor ka “Beti Bachao Beti Padhao”

Syllad | The Rising MeghalayaSeptember 29, 2023

Ka prokram “Beti Bachao Beti Padhao” lane ka prokram kaba iadei bad ka”jingai jingsumar sukher, jingnang jingstad bad jingiada ia ki khun khynthei ba la pynlong da ka ophis ka BDO, Mawryngkneng C & RD Block, East Khasi Hills District kaba iaid mynta la kumba shibnai ei ei ka la poi noh sha kaba kut haka sngi Palei ha phyllaw ka ophis hapdeng ka jingiphuh iphieng da ka jingai khusnam ia ki khynnah kynthei kiba la lehbha ha ka liang ka pule puthi, ki jingleh ialehkai bad kumjuh kiba duna ha ki dkhot met da U MLA ka Mawryngkneng u Bah Heavingstone Kharpran uba long kum u kongsan bad I Kong RM Kurbah, IAS, DC, East Khasi Hills District kum I symbud kongsan.

Haba kren ha kane ka sngi kum u kongsan, u Bah Kharpran ula pynpaw ba ka jingjyllei ka POCSO case ha kane ka jaka jong ngi namar ba ki briew kim pat sngewthuh bha shaphang ka, namar kata u ong ba ngi donkam ban tip ia ka khnang ba ngin lah ban tehlakam ia ki jingsniew kiba harrukom khamtam lei ia ki kynthei.

U la ong ruh ba ki kynthei ki don ia ka mynsiem kaba pher ha kaba ki kloi ban iarap ia kiwei. U la pynpaw ba ka Sorkar ka la pyrshang ban wanrah bun ki scheme na ka bynta ka bha ka miat jong ki kynthei, bad ki longkmie. U la kyntu kynpham ia ki khynnah kynthei ba kin long kiba don akor kiba don burom ha ka iaid ka ieng ka ktien ka thyllieh bad ha ki kam ki jam.

Katba na ka liang ka Kong RM Kurbah ha ka jingkren ka la ong ba ka jingim jong ki kynthei ne longkmie ki trei bun ki kam, hynrei hapdeng ka jingeh ba bun kum ka jingbym da iohlad bha ban pynsngew ia ka jingtip, jingshemphang jong ki ha kiba bun ki liang,wat la kata ruh ki la pyniaid bha ia ka kam ka jam jong ki ha la ki jong ki iing ki sem ne shabar ha ka rukom kaba dei.Ka la kyntu ruh ia kikhynnah ba ki dei ban long kiba husiar bha ha ka jingim jong ki khamtam ha ka jingiadei paralok jong ki khnang ba kin ioh ia ka jingim kaba phyrnai.

La pynphuh pynphieng ia kane ka sngi da ka jingialeh  drill ieit ri da ki khynnah skul jong ka Mission UP School bad la pynshngain shuh shuh ia kane ka prokram da ka jingiadon lang ki Anganwadi bad ki dkhot ki SHG.

Kiwei pat kiba la ia don lang ha kane ka sngi ki kynthup ia ki ophisar na ka tnat ka koit ka khiah, ICDS, Block Mission Coordinator (BMC), SSA, Mawryngkneng, ki pulit na ka Mawryngkneng PS, ki nonghikai, ki khynnah skul bad kumjuh ruh ki ophisar bad nongtrei jong ka Block ophis. Ha kane ka sngi la don ruh ka jingpyni bad die ia ki mar ki mata ba la shna bad pynmih da ki  Producer Group bad ki SHGs.

Ia ki kyntien maitphang la ai da ka BDO, Mawryngkneng C & RD Block, Kong A. R. Kynta, MCS  bad ia ka prokram la pyniaid da  I Bah Albinus Nongkynrih, Asst. Manager cum ERP i/c EFC (MBDA), Mawryngkneng bad kiwei pat kiba la aijingkren ha kane ka sngi kynthup ruh ia i Kong LoriannaKahit, Lady Supervisor, ICDS bad Bah Tamlin Diengdoh, BMC, SSA, Mawryngkneng.

Kum ban shu pynkynnaw hangne ba ki prokram bapher bapher kum ka  prokram jingpynshai paidbah halor ka ain ka kanun kaba iadei bad ka POCSO bad Juvenile Justice Act  bad kiwei de kum ki prokram na ka bynta ka koit ka khiah ki khynnah kynthei bad ki long kmie ba la pynlong da ka PHC, Diengpasoh  bad kiwei kiwei de ki prokram na ka bynta ki khynnah pule la pynlong ha ki skul bad jaka bapher bapher da ka ophis ICDS bad ka ophis u Block Mission Coordinator (BMC), SSA.