Kut noh ka prokram ialap ba lai bnai ka MACS halor ka koit ka khiah ha East Jaintia Hills

Syllad | The Rising MeghalayaSeptember 9, 2023

Ia ka jingialap bad pynshai paidbah ba lai bnai kynthih halor ka koit ka khiah bala khot pynlong da ka Meghalaya Aids Control Society (MACS) ha ryngkat ka jingiatreilang bad ki bor pyniaid  District ka EJH, ka ophis District Medical & Health Officer, EJH lem bad kiwei pat ki Tnat sorkar ka la kut noh mynta ka sngi Saitjain hapoh ka ophis jong u Dy Commmission ka EJHD ha Khliehriat.

Ha kane ka sngi la ia don lang u Bah Kyrmen Shylla, Myntri ka Tnat Home (Passport), Revenue bad Disaster Management Department kum u Kongsan nalor u Bah Mayralborn Syiem, MLA, Chairman Meghalaya State Health Advisory Board ka sorkar Meghalaya, Bah Gautam Warjri, MCS, Addl. Deputy Commissioner, EJH, Dr. Dominic Shylla, District Medical & Health Officer, Dr. B. Decruse, Project Director ka MACS bad  Dr. L. Myrthong, Deputy Director (Medical) MACH nalor kiwei pat.

Haba kren ha ka jingialang u Bah Kyrmen Shylla u la pynpaw ba  kane ka jingpynshai paidbah halor ka koit ka khiah ka la long kaba seisoh lyngba ki sienjam jong ka jingiatreilang.Halor kiba bun ki jingeh kiba iadei bad ka koit ka khiah ha kane ka pyrthei kaba mynta u la ong ka donkam ia kiba bun ki lad ki lynti ban ialeh pyrshah.

U la kdew ruh ba ka jingthmu ba kongsan jong kane ka jingialap ka long ban wanrah ia ka jingtreilang hapdeng ki kynhun aijingsumar, ki nongshna ia ki polisi, ki riew wad bniah bad khamtam ki riew shimet bad ki nongshong shnong. U la ong ruh ban poi sha ka thong donkam ban ai bor ia ki briew lyngba ki jingtip ha kaba iadei bad ka koit ka khiah bad ka jinglong jingman ka jong ki.Kane ka kynthup halor ka jingkyntiew ia ki jingmlien kiba tei ia ka koit kak hiah bad ka jingai jingmut lyngba ki polisi ki ban kyrshan ia ka koit ka khiah jong ki paidbah.

Ha kajuh ka por u ai ruh ka jingiaroh ia ki sienjam ba la shim da ka Meghalaya Aids Control Society kaba la lamkhmat ha kane ka jingialap hapoh ka district ha ryngkat ka jingkyrshan lang da ki bor ka district, ka tnat ka koit ka khiah bad kiwei pat ki kynhun kiba ia don bynta ban pynlong ia kane ka jingialap kaba jop.

Katna na ka liang u Bah Mayralborn Syiem, MLA ula pynpaw halor ka jingdonkam ia ka jingiatreilang ban pynkhlain shuh shuh ia ki jingialap kiba thmu ban pynshai halor kiba bun ki mat, kata kum halor ka jingpang HIV/AIDS ha ka imlang sahlang. U la ban ruh ba kine ki jingialap ki dei ruh ban bteng sha kiwei pat ki district kumjuh, kata da kaba kyrpang ia Project Director ka Meghalaya Aids Control Society ban pynlong ia kiba kum kine ki juh ki jingialap hapoh Ri Bhoi District.

U la kdew ruh ba kane ka district ka don ia kaba jan bha ha ki jinglong jingman ha kaba ka jingpang HIV/AIDS ka lah ban saphriang. Kumta ruh u la ban jur halor ka jingdonkam ia ki jingpynshai paidbah bad ka jingai jingkyrshan da kito kiba la shah ktah ha kane ka jingpang khnang ban kham shemphang bad ruh ban ai ia ka jingkyrshan.

Da kaba pynpaw halor ka jingsngewkhia halor ka jingkynrei ki kam khaii bad pyndonkam drok hapdeng ki samla ka jylla khamtam hapoh kane ka district, u bah Mayralborn u kyntu ia ki khynnah skul bad kolej ba kin kiar raimaw raidieng na une u jait jingdih ba shyrkhei.

Ia ka jingpynshai kaba bniah halor kane ka jingialap la pynshai da Dr. B. Decruse, Project Director ka MACS, bad kiwei pat ki jongkren ha kane ka prokram ki kynthup ia u Bah G. Warjri, MCS, Additional Deputy Commissioner ka East Jaintia Hills District, Dr. Dominic Shylla, District Medical & Health Officer, bad  Dr. Mr. A.M Lanong, Deputy Director of Mainstreaming at MACS, nalor kiwei pat.

Ha kane ka jingialang na ka liang u Bah Kyrmen Shylla bad u Bah Mayralborn Syiem ki la plie ruh ia ka  Mobile ICTC Van bad la sam ruh iaki khusnam sha baroh kiba don bynta kynthup iaki seng trei kam bhalang.