Kut noh ka Shad Suk Mynsiem hapdeng ka jingiphuh iphieng bad shongkun
Ka Shad Suk Mynsiem kaba 113 kaba la sdang naduh ka sngi Saitjain ba la lah ka la kut noh ha ka 15 tarik mynta u bnai hapdeng ka jingiphuh iphieng bad shongkun ha ryngkat ka jingsakhi jong ki hajar ngut ki paidbah na kylleng ka Bri u Hynniewtrep.
La pynkut noh ia kane ka Shad Suk Mynsiem ba lai sngi kynthih ia kaba ju pynlong man la ka snem da ka Seng Khasi Seng Kmie ha Madan Shad ha Weiking, Jaiaw shibynta kum ka dak ban ainguh aidem ia u Blei Trai Kynrad halor ki jingkyrkhu kiba u la theh sei sha u khun bynriew.
![](https://www.syllad.com/wp-content/uploads/2024/09/JIT-Vacancy-823x1024.avif)
Wat hapdeng u slap uba jur, hynrei da ki spah ngut ki nongshad shynrang bad kynthei kata naduh kiba dang rit ki la iashim bynta shithrem ha ka shad ka kmen ha ryngkat ka jingpynsawa ia ka ksing ka dhah bad ka tangmuri ban ainguh ia ki jingkyrkhu jong U Blei Trai Kyrnad.
Haba ai jingkren ha kane ka sngi pynkut ia kane ka Shad Suk Mynsiem na ka liang u Vice president ka Seng Khasi Seng Kmie u Rangbah BS Rumnong u la ong ba ka Shad Suk Mynsiem ka dei ka jingshad ainguh jong ki trai trai ri trai muluk ia U Nongbuh Nongthaw uba la kyrkhuh halor ka rep ka riang, ka koit ka khiah, ka spah ka phew bad na ka bynta ka jingsuk.
Nalor kata u la ong ruh ba ki la don haduh kumba 1,634 ngut ki nongshad kiba la wan ban iashim bynta ha kane ka Shad Suk Mynsiem mynta u snem.
Ia kane ka Shad ka Kmen la wan sakhi lang ruh da u Myntri ka Tnat Toursim u Bah Paul Lyngdoh, ki heh sorkar bad kiwei kiwei ki riew pawkhmat na kylleng ka Bri u Hynniewtrep.
Leave a Reply