Kut noh ka tamasa Sohtrun kaba ar ha ka nongbah Delhi; la pyniaid iew haduh 6.5 ton u Sohtrun

Syllad | The Rising MeghalayaJuly 14, 2024

Ka tamasa Sohtrun kaba san sngi kynthih ba la tip kum ka ‘Meghalaya Pineapple Fest 2024’ ba la khot pynlong da ka sorkar Meghalaya ha ka nongbah New Delhi ka la kut noh ha ka 14 tarik mynta ha kaba la sakhi halor ka jinglah ban pyniaid iew haduh 6.5 ton u Sohtrun ba la pynmih na kane ka Jylla.

Ha kane ka sngi la wan ban sakhi lang ruh da u Myntri Rangbah ka Jylla u Conrad K Sangma uba la jurip ia ki iew die Sohtrun jong ki nongrep bad iamir jingmut ruh bad ki kumjuh bad ki nongtrei kam lajong hapoh kane ka iew.

Kane ka tamasa Sohtrun ba la pynlong ha ka sien kaba ar ha Dilli Haat, New Delhi la sakhi ia ka jingwan tuid jong ki briew na ki bynta bapher bapher jong kane ka nongbah bad na kiwei pat ki jaka  kiba la ai ka jingiaroh ia ka jingthiang jingshngain jong u Sohtrun ba khlem ai dawai ba la pynmih na Meghalaya. 

U Myntri Rangbah ka Jylla u la ban jur halor ka jingbei tyngka jong ka sorkar kaba long haduh T.5.63 klur na ka bynta ki jingtei bad  jingshna bad T.1.39 klur ha ka pisa ban treikam bad T.78 lak la mang kyrpang na ka bynta u Sohtrun haduh u snem 2023.

Kine ki sienjam ki ba wanrah ia ka jingjop kaba khraw, kaba kynthup halor ka jinglah ban shalan haduh 4.36 MT u Sohtrun sha la Lulu Group Abu Dhabi. Nalor kata jan kumba 300 MT ruh la lah ban shalan sha ki ri Europe hadien ba la dep ban pyndait-thah ha ka PRIME Hub ha Ri Bhoi District.Nalor kata kine ki sienjam ki la kyntiew ia ka jingioh kamai jong ki nongrep da haduh 30-122 percent kaba la pynmyntoi beit beit ia palat 300 ngut ki nongrep bad da kawei pat ka rukom ia palat 5000 ngut.

U Conrad u la kdew ruh halor ka jingkiew shaphrang ha ka kam karkhana Sohtrun bad pyntip ruh ba la thaw haduh 11tylli ki Collective Marketing Centres (CMC) na ka bynta ban shalan ia ki Sohtrun kiba dang shu kheit thymmai. U la pyntip ruh ba la thaw haduh 338 tylli ki kynhun seng treilang ne ki Integrated Village Cooperative Societies (IVCS) bad 28 tylli ki seng pynmih mar rep ba khlem pyndonkam dawai ne Organic Farmer Producer Organizations (FPOs) ban khanglad na ka jingshah ktah ha ki nongkhaii kiba don hapdeng bad ka jingkiew dor na ka bynta ki soh kiba dang shu kheit thymmai jong ka iew.

Lyngba ki sienjam ki ban wan, kata kum ka jingpynmih ia ki kali kiban iarap kit ia ki mar rep, ki iing ban buh ia ki mar rep bad ki iew na ka bynta ki nongrep, kine ki seng treilang ki trei kum ki paralok ha ka khaii pateng ba kongsan na ka bynta ki kynhun nongthied bad ruh kum ki nongshalan mar shabar ri.

Nalor kata u Myntri Rangbah u la ong ruh, “Da ka jingthmu ban kyntiew arshah ia ka jingioh kamai jong ki nongrep, na ka liang ka sorkar ka la sdang ia ki lad jingiarap ha ka rukom jong ka mission na ka bynta ki mar rep kiba rem dor. Kine ki jingiarap ki kynthup na ka bynta ki mar rep kum u Shynrai, Sying, Tit, Musli Musla, Sohniamtra, Sohtrun bad kiwei pat ia kiba la shna khnang ban long ki jingpyrshang kiba pura ha ka imlang sahlang ha kaba ki nongrep kin long pdeng halor kine baroh.”

Kumjuh u Conrad u la pynthikna ruh halor ka jingkyrshan jong ka sorkar Jylla na ka bynta ki kynhun nongrep da ki jingai ram ba khlem sut kaba kot haduh T.78.82 lak ha u snem 2023-2024 khnang ban pynurlong ia ka jingpynmih ba la buh thong kaba long 540 MT, kata kaba pynduh noh ia ka rukom treikam kaba bakla, ka jingiarap pisa kaba ba duna ha kaba pynpoi ia ki mar rep shabar u pud u sam jong ka jylla da kaba pynlut kumba T.8.12 lak na ka bynta ka jingpyrshang ban pyniaid iew ia kumba 22.3 MT u Sohtrun ha u snem 2023.