Kut noh ka Wildlife Week ha West Jaintia Hills, ïoh ïing duwan ba shongdor T. 30 lak ka Raij Ionglang

Syllad | The Rising MeghalayaOctober 11, 2021

Ka Wildlife Week 2021 kaba la pynlong da ka tnad Forests and Environment, Government of Meghalaya (Wildlife Division) kala poi sha kaba kut ha ka shnong Ionglang, West Jaiñtia Hills District haka sngi Nyngkong.

Ha kane ka prokram la plie paidbah ruh iaka ïïng duwan ka Raij U Langdoh Ionglang kaba la tei haka dor T.30 lak na ka skim Integrated Development of Wildlife Habitat. Ka Raij Ionglang kala ioh ia kane ka skim hadien ba ka la mynjur ban pynkylla community forest iaka law kyntang kaba heh 15.12 hectare kaba ka tnad kam khlaw kala pynbna naduh u snem 2016.

Kane ka community reserve ka dei kaba 79 na ki khlaw kiba iada da ka tnad khlaw ka jylla bad ka jaka khlaw baroh ka heh haduh 6440 hecter.

Ka DFO Jaintia Hills Wildlife Division, Kong Heisa Lato kala iathuh haka jing sorjamin ha u snem 2018, la shem ba hapoh katei ka khlaw la don haduh 131 jait jingthung ba kynthup iaki syntiew ki skud bad ki dieng ki siej. 69 tylli ki jait dieng ba har rukom, 28 jait ki jhur bad kynbat, 22 ki dieng rit bad 60 jait ki jait sim. Kane ka khlaw ka don ruh iaki mrad khlaw Huleng (Hoolock Gibbon) kiba lap ha Narpuh Wildlife Sanctuary ha East Jaiñtia Hills.

Ha kane ka jingpynkut iaka Wildlife Week la wan ban iadonlang da u SM Sahai, Principal Chief Conservator of Forest (Administrator) kum u kongsan katba u HC Chaudhary, Chief Wildlife Warden, kum u symbud kongsan haka jingiadonlang ka DFO Wildlife Division, Jaintia Heisa Lato bad kiwei kiwei ki ophisar, u Dolloi ka Elaka Raliang ma Chawas Lyngdoh, u ma Rikut N Parien ula pyniaid iaka jingialang nalor ki khynnah skul.

Ka matpdeng jong ka Wildlife Week mynta ka kynti ka dei ‘Forest and Livelihoods: Sustaining People and Planet’.

U SM Sahai, Principal Chief Conservator of Forest (Administrator) haba kren ula ong kadei ka kamram jong uwei pa uwei u nongshong shnong ban pynneh pynsah ïaki khlaw ki btap bad ki jingthaw ba im.

“Ka jylla Meghalaya kadei kaba riewspah bha haka jingdon ïaki khlaw ki btap, phlang ki kymbat, ki mrad ki mreng bad ki dieng ki siej”, la ong u Sahai bad ula kyntu ïaki paidbah ban tyngkai ïaki khlaw ki btap bad ban sangeh ban pynïap dusmon ïaki mrad ki mreng, ki sim ki doh namar ki don ka bynta kaba khraw ban pynbha iaka mariang.

Kiwei de kiba la ai jingkren ki kynthup ia u HC Chaudhary, Chief Wildlife Warden, u James M Pohsngap, u Dolloi ka Elaka Raliang u Chawas Lyngdoh bad ki kyntien khublei na u S. Law Range Forest Officer.

Hadien ka jingïalang la sam khusnam sha baroh ki nongjop haki jingïakop bapher bapher kum ka jingïakop Drawing, Extempore Speech bad Quiz ba la pynlong da ka tnad Wildlife haka jingdonlang ki nonghikai bad ki khynnah skul.