Kut noh ka Youth Convention ki samla ka parish Ladrymbai

Syllad | The Rising MeghalayaDecember 13, 2021

Ka Seiñ Khynroo Khyllood Katholik Good Shepherd Parish Ladrymbai ka la pynlong ia ka Jingiashemlang ba shisien shisnem ba tip kum ka XIX Annual Youth Convention 2021 kaba long haka 10-12 Nohprah haka Balang Pamrakmai, East Jaintia HIlls District.

Ka phang pdeng kane ka convention- “Phi long ki bakordor ha ki khmat jong Nga, bad phi la ïoh burom namarba Nga ieid ïa phi.” (Isaiah 43:4).

Ia kane ka Convention la wan plie da i Dr. Sanky Shangpung, Chairman JHADC kum u kongsan haka jingiadonlang u Parish Priest Rev. Fr Aibor Dennis Nongbah ryngkat Rev. Fr. James Eleazar Bareh, Spiritual Youth Director, u Ripos Lyngdoh bad Wellson R D Siangshai kiba long ki president bad secretary sein khynroo.

Ha ka jingkren kum u kongsan, u Dr Sankey ula kyntu bad pynshlur ia ki samla ban wan shakhmat ha ka ban kit ban bah ia ka lyngkor na ka bynta ban shakri ha ka Niam ka rukom ka Shnong ka thaw bad ha Imlang sahlang wat lada ngi hap ban mad bad shem shibun ki jingeh ki jingtynjuh bad ki jingkynthoh jong ki ba bun hynrei ngi dei ban iaineh bad ieng skhem ha ka Nongrim kum ki Samla ym ban dooh Jingkyrmen.

Ha kine ki lai sngi la ioh ia ka  jingsneng jingkyntu na ki 3 ngut ki Resources Person, Samla Becare Me Oo Nongtdu, Kong Hildamary Pasi bad na i Fr. Ebormitre Henry Lamare.

Kum ban pynshlur bad ailad ia ki samla ba wan iashim bynta ha kine ki sngi Convention la don da ki jingialehkai ba bun jait (Games), Cultural Show Competition ha ka ba ka Balang Pamrakmai kum ka Nongjop ba Nyngkong, Balang Sohkymphor Nongjop ba ar bad Balang Cham Cham kum Nongjop ba lai, bad ruh la pynlong ia ka Debate Competition halor ka phang Ki Samla bad ka Mobile ha ka juk ba mynta (The Youth and Mobile Phone in the modern age) ha kaba ka Samla Juliana Lyngdoh na ka Balang Rangad kum ka Nongjop  lane kum ka Best Speaker

Ha ka Sngi U Blei la pynlong ia ka Mass Bakhuid ha kaba u Rev. Fr James Eleazar Bareh Spiritual Youth Director kum u nongknia rangbah bad la pynkup bor ia ki Nongkitkam Bathymmai jong ka Seng.

Ia kane ka Convention la wan pynhap pyrda da u Ma Bhamon Phawa kum u kongsan bad jingsam ia ki khusnam sha ki Nongjop.

La iashim byntalang ha kane ka sngi da ki rangbah, longkmie longkpa bad ki heprit bad  baroh ki khun samla  kumba 260 tam ngut ei ei na ki 24 tylli ki Balang Shnong ba hap hapoh ka Parish Ladrymbai.

La pynshongshit bad pynphuh pynphieng ia kane ka Convention da ka put ka tem, ka shad ka kmen bad ka rwai ka siaw.

Ia kane ka convention la pynlong ha kylleng ki parish jong ka Jowai Diocese.