Kut taiew yn pynkhuid ka JMB ia ki ñiut na sor Jowai

Syllad | The Rising MeghalayaApril 22, 2022

Ka Jowai Municipal Board (JMB) haka sngi Thohdieng kala pyntip sha ka iingbishar ba kan pynkhuid ia baroh ki ñiut kiba satah haki jaka iew ha sor Jowai ha kane ka kut taiew.

Ka ïingbishar Meghalaya High Court haba shong bishar iaka PIL kaba ujor da ka Synjuk Waheh Shnong Jowai pyrshah iaka Sorkar Jylla, Commissioner and Secretary ka tnad Urban Affairs, Jaintia Hills Autonomous District Council, Jowai Municipal Board bad kiwei, ka Jowai Municipal Board bad ka sorkar kila ai report ba kila dep jied iaka jaka bret ñiut ba shipor bad ka jingkit iaki ñiut kala sdang mynta ha sor Jowai.

Ka Jowai Municipal Board kala iathuh ba iaki niut na surok ha Iawmusiang la dep pynkhuid bad ia ki niut ba dang sah yn pynkhuid ha kane ka kut taiew.

Also Read | Trei ka Chad Sukra Jowai, pynkhuid ka JMB iaki ñiut ki ñier ha Iawmusiang

Namar ba baroh kiba don bynta kynthup ka sorkar kila shimkhia ia kane ka kam bad lum jingialang ban jied ruh iaka bret niut ba thymmai, ka iingbishar kam shym la pynmih kano kano ka hukum kaba thymmai.

Nakaliang ki 6 shnong kiba la kynthup lang ha kane ka mukotduma kila ai iaka jingpynshai bad la ong ba ka sorkar jylla ka dei ban pynthikna ban pyntreikam iaka Solid Waste Management Rules, 2016 kaba la pynmih da ka sorkar pdeng kaba hap hapoh ka Environment (Protection) Act, 1986 da kaba shna bad tei ia baroh ki jingdonkam.

Ka iingbishar kan shong bishar biang ia kane ka kam hadien ar taiew.

Shuh shuh ka iingbishar kala bthah ruh iaka sorkar Jylla ban peit ia kane ka kam bret ñiut ym tang ha Jowai, hynrei ha baroh kawei ka jylla.