Kut tang haka kular, ka Behdieñkhlam kala kut, ka tulop pat ioh: JHADC Staff Assoc

Syllad | The Rising MeghalayaJuly 14, 2022

Ki nongtrei jong ka Jaintia Hills Autonomous District Council (JHADC) Staff Association ki la pynpaw ka jingbynniaw halor ka jingbym bat kular jong u Myntri Rangbah ka Jylla u Conrad K Sangma uba la kular ban pyllait ïaka bhah pisa jong ka konsil kumba 30 klur tyngka hashwa ka Behdeiñkhlam.

Haba ïakren bad ki lad pathai khubor u president ka JHADC Staff Association Ma Johnson Pohrmen ula ong, ha ki khyndiat sngi ba la dep ki MDC ka liang synshar ha JHADC haka jingïalam jong u CEM u Ma Thombor Shiwat bad u MLA ka Jowai Constituency u Ma Wailadmiki Shylla kila leit ïakynduh ïa u Myntri rangbah ka Jylla Meghalaya haka 8 Naitung ban pynsngew ïaka jingeh jong ka JHADC bad ka jingbym ïoh tulop jong ki nongtrei kaba ka kynjoh sha ka duna shisnem eiei.

Ula ïathuh ba haka jingïakynduh bad u Myntri Rangbah, u CEM ka JHADC bad MLA ka Jowai ki la pynsngew sha ki lad pathai khubor ba u Myntri Rangbah ula kular ban pyllait ïaka bhah pisa kumba 30 klur tyngka sha ka JHADC bad ïa kane ka pisa yn pyllait haka 11 tarik Naitung khnang ban ïoh siew ïaka tulop jong ki nongtrei ka JHADC hashwa ka Behdieñkhlam, pynban haduh mynta ka JHADC ka khlem ïoh ïaka bhah pisa na ka sorkar Jylla bad ym shim lah ban siew ïaka tulop jong ki nongtrei.

Ula kynnoh ba kane ka jingshukor jong u Myntri Rangbah ka pyni ba u khlem burom satia ïaki MDC bad nongtrei jong ka konsil. Ka jingleh jong ka sorkar Jylla ban bat sah ïa ka bhah jong ka JHADC kan buh jingeh iaki nongtrei ka konsil.

Ula pynkynmaw ruh ba ha u snem ba la leit, ki nongtrei jong ka JHADC ki la ai mukotduma shaka ïingbishar jong ka Meghalaya High Court halor ka jingduh tulop jong ki nongtrei ka JHADC bad lyngba ka jingïarap ka ïingbishar ki nongtrei ki ïoh ïaka tulop haduh u bnai Naitung (July 2021).