Kwah ka AIFF ban pynlong ia ki artylli ki jingialehkai ki kynhun bar ri ha Shillong

Syllad | The Rising MeghalayaJanuary 12, 2025

Kan long lehse ka khubor ka ban pynkmen ia ki riew ieit football hadien ba na ka liang ka All India Football Federation (AIFF) ka la tyrwa sha ka Meghalaya Football Association (MFA) na ka bynta ban pynlong ia ki artylli ki jingialehkai ki kynhun bar ri ha kane ka nongbah shillong, kata ha Jawaharlal Nehru Sports Complex, Polo.

Kine ki artylli ki jingialehkai kiba ka AIFF ka la tyrwa sha ka MFA ka long ba ha ka 19 ne ka 20 tarik u bnai Lber u ban wan kan don shwa ka jingialehkai paralok (international friendly match) hapdeng ka India pyrshah ia ka Maldives.

Nalor kata yn bteng da ka jingiakhun jong ka lympung AFC Asian Qualifying Round, ha kaba ka India kan khreh ba kan aireng pyrshah ia ka Bangladesh, bad kane ka jingiakhun la buh ba kan long ha ka 25 tarik u Lber mynta ka snem.

Haba iadei bad kane ha ka 11 tarik Kyllalyngkot ka la don ka jingwan jurip da u Akshay Rohatogi uba dei u Head of Competition ryngkat bad u Abhishek Yadav uba bat kum u Deputy General Secretary ka AIFF, ia baroh ki bynta jong ka JN Stadium, Polo.

Na ka liang u president ka MFA u Bah Hamletson Dohling haba kren halor kane ka bynta u iathuh ba kane ka jingtyrwa ka AIFF ka la wan lyngba ha u president ka synjuk kata u Kalyan Chaubey, haba u bah Hamletson u la pynpaw ba na ka liang ka jong u ula jubab ba mar mar yn ym lah ban ong hooid ne em, hynrei u la pynpaw ha u Chaubey, ba un rah ia kane ka khubor ban pynsngew shwa sha ka sorkar jylla.

Kham hadien u bah Hamletson u la pynpaw  ia ka jingsngew kmen ba ynda haba u la ioh ban pynsngew ia kane ka khubor, ka sorkar ka la mynjur ba kan iadon bynta lang bad ka MFA lem bad ka AIFF ban iadon bynta ha kaban pynlong ia kine ki artylli ki jingiakhun.

Kumjuh hadien ka jingwan ki briew na ka AIFF, la 20 tarik mynta u bnai, kan don sa ka jingwan jurip jong ki briew kiba dei napoh ka Asian Football Confederation ne ka AFC, ha kaba ka rai kut ba ka nongbah Shillong kan ioh ba kan pynlong iakine ki lympung kan dei lyngba kane ka jingjurip.

Na ka liang u Bah Hamletson kum u nongialam ka MFA u kyrmen ba kiei kiei baroh kin iaid beit kumba la thmu bad ba kan long shisha ka burom ia ka jylla ban ioh pynlong ia kine ki artylli ki jingiakhun hangne hapoh ka nongbah.