Kwah ka Sorkar ban pynlong ia ka Meghalaya ka nongbah pynmih waiñ soh hapoh ka ri: CM

Syllad | The Rising MeghalayaSeptember 14, 2023

U Myntri Rangbah ka Jylla u Conrad K Sangma u la ong ba ka sorkar ka don ia ka jingangnud ban pynlong ia ka jylla Meghalaya kum ka nongbah kaba lah ban pynmih ia ki wain soh ne ‘fruit wine’ jong ka ri India.

Ia kane u CM u la pynpaw ha ka jingplie paidbah ia ka North East Fruit Wine Incubation Centre kaba nyngkong eh hapoh ka thain shatei lammihngi ha IHM Campus, Mawdiangdiang mynta ka sngi Palei ha ryngkat ka jingiadon lang ka Myntri ka Tnat ka rep ka riang ka Kong Ampareen Lyngdoh bad u Myntri ka Tnat Excise Bah Kyrmen Shylla.

Ha ka jingkren u Conrad Sangma u la ong ruh ba kane ka thmu ruh ban pyniasoh ha kaba iadei bad ki lad ki lynti ban kynrtiew ia ki kam jngohkai pyrthei, ka rep ka riang, sengkam seng jam abd ki lad thaw kam lyngba ka jingkyntiew ia ki nongshna wain trai jylla lyngba ki soh ki pai. U la ong ruh ba kane ka sienjam ba la shim da ka sorkar kam thmu tang ban kyntiew ia ki kam pynmih wain, hynrei ka ban pynmyntoi ruh ia ki nongrep, ki nongwan shangkai pyrthei bad ki nongseng kam ha ka jylla.

Nalor kata u kyrmen ruh ba ka jingdon ia kane ka wine incubation ne ka jaka saindur ia ki wain kan plie ia ka rynsan na ka bynta ki nongseng kam lajong ba kin pyrshang ban pyndonkam ia kane ka tiar bad ka ban kyntiew ruh ia ka ioh ka kot lyngba ka jingpynmih wain lyngba ki soh.

Haba pynpaw ka jingsngewkhia ha kaba iadei bad ka jingioh laisen na ka bynta ki nongshna wain, u CM u la pynthikna ba ka jingsiew na ka bynta ka laisen na ka bynta kane ka kam kan long kaba rit.U la pyntip ruh ba na ka liang ka sorkar ka la don ha ka lynti ban pynkhreh ha kaba iadei bad ka jingleh ia ka rejistation na ka bynta ban pynsuk ia ki nongshna wain trai jylla.