Kwah ka sorkar ban wan u chairman bad general secretary ka HNLC haka jingialang kren iasuk: Prestone

Syllad | The Rising MeghalayaSeptember 5, 2023

U Deputy Chief Minister ka Jylla ba khmih ia ka Tnad kam Pohiing (Police) Bah Prestone Tynsong ha ka sngi Nyngkong ula ong ba ka sorkar kala dep phah ktien sha ka Hynniewtrep National Liberation Council (HNLC) ba ka kwah ban wan u chairman Bah Bobby Marwein bad u general secretary Bah Sainkupar Nongtraw haka jingiakren iasuk ka ban wan.

U Bah Prestone ula ong ba ka rai mynta ka shong ha ka HNLC bad ka Sorkar ka dang ap ban pyniaid shakhmat bad ka jingiakren iasuk. “Ngi dang apktien na ki (HNLC). Ngi la dep ban aiktien sha ki. Mynta ka rai ka shong ha ki” ula ong bah Prestone haba kren bad ki nongthoh khubor.

U Bah Prestone ula ong ba ki ap iaka jubab na ka HNLC bad haka jingialang ban wan u chairman lane u general secretary ki dei ban iadonlang ha ka jingiakren. Ula ong ruh ba ka Sorkar Jylla bad Sorkar Pdeng ka kwah ban pynlong biang iaka jingiakren iasuk bad ka kwah ia kine ki nongialam ba halor jong ka HNLC kin wan iadonlang.

Kane ka jingkren u bah Prestone kala mih hadien ba ka HNLC kala pynpaw ia ka jingpyrshah kaba jur halor ka jingkhot hajir ia u general secretary Bah Sainkupar Nongtraw hapdeng ka jingiakren iasuk. Ka HNLC kala dawa ruh ia ka Sorkar ban map noh ia baroh ki kam bymman bala pynngat ia ki nongialam jong ka lym kumta ka HNLC ka lah ban weng noh ialade na ka jingiakren iasuk.

U Bah Prestone ula ong ba ka jingshah khot hajir kam dei kaba khot da ka Sorkar, hynrei ka dei tang ka kam ba ju leh da ka ïingkashari.

Halor ka jingdawa ka HNLC ban map noh ia ki kam bymman bala pynngat, u Symbud Myntri Rangbah ula ong “Ha ka kylla ba nyngkong jong ka jingiakren iasuk, ngi la iakren ia baroh kine ki ishu. Ngi la pynpaw ruh ba ngi kwah ban iakren bad ki nongialam kiba hakhlieh duh ym tang u vice chairman. Lada ki shimkhia shisha, ka Sorkar Jylla bad Sorkar Pdeng ki da shimkhia shisha bad nga kyrpad ia ki ba kin aiktien ia ka rai jong ki lyngba u nongmihkhmat jong ki. Ngi long kiba la khreh ban nang iashong jingialang ha ki sngi ban wan”.

U Bah Prestone ula ong “Ka kam bymman ka dei ka kam bymman. Ngam tip kaei kaba phi mut da kaba ong ki kam bymman ba shyrkhei (heinous). Ka kam bymman hi ka dei ka kam bymman kam pher la ka dei kaba heh ne kaba rit bad ka dei ka sobjek jong ka Ain. Kaei kaba nga ong ka long ba ka ain kan iaid laka jong ka lynti. Haba don ki kam bymman, ngi hap ban leh ia kata bad kam don lynti da kumwei pat”.