Kwah pynkylla ka KHADC ia ka ST Order 1950 ban ithuh beit thik tang ia ki riewlum ka Jylla kum ki ST

Syllad | The Rising MeghalayaOctober 31, 2024

Ka Khasi Hills Autonomous District Council (KHADC) ka la rai ban buddien bad ka Sorkar Jylla na ka bynta ban kyntu ia ka Sorkar Pdeng ba kan pynkylla thymmai ia ka Constitution (Scheduled Tribes) Order, 1950 khnang ban ithuh kyrpang beit tang ia ki trai shnong riewlum ka Jylla kum ki ST ha Meghalaya.

Ia kane ka rai la shim hadien ba ka KHADC ka la ioh pdiang ia ki jingujor pyrshah halor ka jingioh thied jaka pathar da ki briew kiba dei na shabar ka Jylla ha Pillangkata hapoh Ri Bhoi District ha khappud bad ka Assam.

 U Chief Executive Member (CEM) ka KHADC u Bah Pyniaid Sing Syiem haba kren sha ki lad pathai khubor hadien ka jingiakynduh ia u Lat ka Jylla u CH Vijayashankar ha ka 30 tarik u Risaw, u la ong,”Dang shen ngi la ioh pdiang ia ki jingujor halor ka jingjur ka jingioh thied jaka pathar da ki briew kiba na bar ka Jylla ha ka thain Pillangkata, Ri Bhoi District. Ngi la iakren bad ka Sorkar Jylla halor kane ka phang namar lada ngi iakren halor ka Meghalaya Land Transfer (Regulation) Act, ka kdew shai ba la khang pyrshah ia ki briew kiba na shabar ka Jylla ba kin ioh thied jaka ha ka Jylla ka jong ngi. Dei na kata ka daw ngi kwah ban pynkylla ia ka Constitution (Scheduled Tribes) Order, 1950 khnang ban kdew shai kiei ki trai shnong riewlum ba shisha ka Meghalaya.”

“Hynrei, kane ka ain kam shym la khang satia ia ki riewlum kiba dei ki ST na kiwei pat ki Jylla kum ki Naga, Mizo bad kiwei pat ban thied jaka ha ka thain Pillangkata kumba ka long mynta. Ki lah ban don ruh ki bym dei ki riewlum kiba ioh lad ban thied jaka ha kane ka thain,” u la ong da kaba pynthikna ruh ba kane ka Executive Committee kaba mynta ka la shimkhia ia kane ka kam bad buddien ha ryngkat ka Sorkar Jylla.

Nalor kata u CEM u pyntip ruh ba ka EC ka la pynkhamti ha ka Elaka Department bad Land Department jong ka Council ba kin pynbeit ia kane ka kam bad lada donkam kin shim ia ka rai kaba tyngeh ban pynbeit ia kane ka jingeh kaba iadei bad ka jingthied jaka da ki briew kiba na shabar ka Jylla ha kane ka thain khappud ka Assam.

Haba kylli, u CEM u la ong, “Hadien ba la ioh pdiang ia ki jingujor, ngi la khot hajir ia u Syiem ka Hima Mylliem namar ba u Syiem ka Raid Marwet u hap hapoh ka jingkhmih ka Hima Mylliem bad mynta kaei kaba ngi la leh ka long ba ngi la pynkhamti ia kane ka kam sha ka Elaka bad Land Dept kiba la thaw ruh ia kawei ka Committee ka ban khmih halor kane ka kam.”

“Ngi la pynpaw shai ba ngim kwah ia kiba kum kine ki jingjia ba kin wan jia ha kiwei pat ki bynta jong ka thain. Kumta ngin pyrshang ia kaba bha tam ban pynsted ia ka jingtreikam jong ka Committee bad lada ka jinglong jingman ka dawa, ngin sa shim ia ki sienjam ba tyngeh halor kane ka phang,” u la ong.

Ha kajuh ka por u Bah Pyniaid u la ong ba ka KHADC kan ym pdiang satia ia ki aplikeshon na ka bynta ban register ia ka jaka jong ki briew kiba dei na shabar ka Jylla.

“Kumta ruh, ailad ia ka Committee ba kan bishar bniah ia kane ka phang bad ban shim ia ka rai kaba dei. Ngin ym pynhun iano iano ruh hynrei ngin leh ia kaei kaba dei ban leh na ka bynta ban iada ia ka khyndew ka shyiap jong ki trai shnong riewlum jong ngi,” u la ong shuh shuh.