Kwah thied jaka bret ñiut ka Jowai Municipal Board

Syllad | The Rising MeghalayaAugust 10, 2021

Ka Sorkar Jylla lyngba ka tnad Urban Affairs Department (Jowai Municipal Board) kala pynmih iaka jingpynbna paidbah ba ka kwah ban thied jaka na kino kino kiba kwah ban die iaki jaka na ka bynta ban shna iaka jaka bret ñiut iaka sor Jowai.

Katkum ka jingpynbna paidbah kaba la pynmih haka 9 tarik Nailar 2021 ba kane ka jaka bret yn shna ha kata ka dur ban neh junom ban suk ha ki sngi ki ia ban sa wan.

“Kino kino kiba kwah ban die iaka jaka na ka bynta kane ka jingthmu ki dei ban submit iaka jingtyrwa da kaba attest iaki kot dulir khyndew, ka survey map bad ka dor ka jaka bad ban pynpoi iaka jingtyrwa sha u Chief Executive Officer, ka Jowai Municipal Board,” la ong ka jingpynbna.

Ka tarik ba khatduh ban pdiang iaka jingtyrwa kalong 15 Nailur (September) 2021 haka por 3 PM.

Ka jaka ka dei ban heh 50 Acres, ka dei ban jngai 500 meter na ka wah bad 200 na ki pung dohka bad 5 KM na ki surok bah bad ki jaka ba shong ba sah briew, ki jaka lehkai ki khynnah bad ki tylong um bam um dih.

Ia kane ka jaka bret niut ka JMB ym shah ban shna ha ki jaka ba jan ka um ne kaba lah ban wanrah iaka jingshlei um bad ha ki jaka ba jan ki jaka sah kyprang ki mard mreng ne ki khlaw bala ai jingiada kyrpang.