Kyan ka jingiakynad hadien ba shah pyniap 2 ngut ki bar Jylla ha Ichamati, hiar ki bor pulit

Syllad | The Rising MeghalayaMarch 28, 2024

Ka jingiakynad hapoh ka thain Ichamati, East Khasi Hills kaba don hajan khappud ka India bad Bangladesh ka la kyan bha hadien ka jingshah pyniap jong ki arngut ki bar Jylla kaba la wan jia ruh hadien ka jingialang pyrshah CAA ba la khot pynlong da ka Khasi Students Union (KSU) bad kiwei pat ki seng bhalang.

Ka khubor pulit ka iathuh ba la lapdien ia ki artylli ki metiap jong ki arngut ki bar Jylla ia kiba la tip kyrteng kum u Esan Sing bad u Sujit Dutta na ki bynta jong ka Ichamati bad Dalda. Halor kane ka jingiap kine ki ar ngut, ym pat lah satia ban pyndep iaka postmortem bad kiwei ki jingdonkam jong ka aiñ.

Ki pulit ki la ong ruh ba kane ka lah ban dei ka jingdonkti jong ki katto katne ki kynhun runar kiba lah ban shim kabu na katei ka jinglong jingman da kaba pyniap ia kine ki arngut ki bar Jylla ha ka por ba ka KSU ka dang pynlong ia ka rally pyrshah CAA ha ka por mynsgi.

Na ka liang ki bor pulit ka Jylla ha ryngkat ka kynhun Special Operation Team (SOT) nalor ki kali bullet proof ki la hiar mar mar sha katei ka jaka na ka bynta ban iarap lem ban tehlakam ia ka jinglong jingman kaba don hapdeng ka jingsyier kaba mih hadien jong katei ka jingjia.

Katkum ki tyllong khubor la ong ba baroh ki superintendents of police (SP) ki la ioh ia ka jingkyntu ban long kiba husiar bad peitngor bad ban pynlong ruh ia ki jingiaid pahara kum ki lad jingiada na kino kino ki jingjia kiba la lah ban mih.

Nalor kata la kyntu ruh i ki pulit ba kin long kiba la pynkhreh ha ryngkat ki riot gear, ki bom pynsat khmat, ki dieng lathi, ki jingda bad kiwei pat bad ruh ban shim ka jingpynshitom kaba tyngeh pyrshah ia kino kino kiba pyrshang ban thaw jingklumar namar kane ka jingjia ka lah ban pynmih ia ka jingkynad kaba jur na ka jingsngew iapher jaidbynriew.

Nalor kata la aijingmut ruh ban kyntu ia ki bor pyniaid distirct ban pynjari da ka kyndon 144 CrPC bad ban pyrrkhing ia ka jingiaid briew kaba palat 5 ngut  nalor ka jingrah ia ki dieng, ki tari, thied petrol ha ki bilor, umphniang sharak bad kiwei kiwei ki tiar pynmynsaw.

Shuh shuh kane ka jingbthah ka la pynpaw ruh halor ka jingdonkam ban pynlong ia ka jingialang na ka bynta ban wanrah jingsuk lashai ka sngi Palei.