Kylla bamut ka por ka dang don ïa phi mynta kyntu Prestone ïaki nongdro dur bula

Syllad | The Rising MeghalayaFebruary 4, 2023

U Deputy Chief Minister ka Meghalaya bad u National Vice President jong ka NPP u Bah Prestone Tynsong ula ther tyngeh ïaki briew kiba im sngi haki rynsan social media ban thoh bria bad shna dur bula ïa u (Prestone Tynsong), ïa u Conrad K Sangma bad u Sñiawbhalang Dhar haki rynsan social media bapher bapher bad ula kyntu ba kidei ban kylla bamut noh kat dang don ka por.

U Bah Prestone Tynsong ula kyntu ïa kane haka jingïalang paidbah jong ka NPP jong baroh 7 tylli ki Constituency ha rilum Jaintia ha madan Jrisaleiñ Chutwakhu, Jowai haka sngi Thohdieng mynta ka taïew.

Une u National Vice President jong ka party ula kop ba ka NPP kan jop haduh 34 tylli ki seat na ka 60 tylli ki seat bad kan sa thaw sorkar marwei ha une u snem 2023.

Ula ong ruh ba ka NPP kadei ka tang ma ka marwei ka National party na ka thaiñ shatei lam Mihngi bad ka la ïoh ïaka ophis kaba kyrpang jong ka, ha nongbah Delhi haba ula kawang ktieh ïaka United Democratic Party (UDP) kum ka party kaba kut tang hapoh Khanapara.

Une u nongïalam ka NPP, ula put turoi ruh ba kadei tang ka sorkar kaba ïalam da ka NPP kaba nud ban pynbeit ïaka jingïakajia khappud naduh ba la ïoh ïaka jylla mynta la Sanphew snem kynthih namar kiwei ki party ki tieng ïoh rem eleshon te kumta ki shu ïai neh beit haka jingbuh status quo haba ki ïakren pynbeit pud bad ka sorkar Assam.

Ula kular ruh ba lada ka NPP ka thaw sorkar biang kin sa bteng biang ïaka Second Phase ban pynbeit noh ïaka jingïakajia pud ha Block-I, Psiar-Khatkasla bad Khanduli.

Ula pynpaw ruh ïaka jingsngew kthang jong u halor ka jingjia ha Mukroh haba san ngut ki briew ki la shah siat ïap ha ki pulit Assam mynshem snem namar ka jingbym dep pynbeit pud pynbeit sam.

Halor ka jingong jong ka Trinamol Congress ban pynduh pyndam ïaka MoU kaba la ïasoi hapdeng ka sorkar Assam bad ka sorkar Meghalaya halor ki Hynñiew tylli ki jaka ïakajia khappud, u Deputy Chief Minister ula pynrem jur bad kynnoh ba kidei ki mendie ri namar ba kim kmen ïaka jingshongsuk shong shngaiñ jong ki paidbah ha katei ki thaiñ hadien ka jingsoi jong ka MoU.

Haba phai sha ki nonghikai SSA, u Bah Prestone ula pynkynmaw ba ki nonghikai SSA kim shym la ïoh tulop da ki bun bnai ha u snem 2017 ha ka por jinglong Chief Minister u Dr Mukul Sangma bad u la ong ba sorkar MDA marsien shimti ka la siew ïaka tulop jong ki nonghikai SSA hapoh 20 sngi.

Ula ong ruh ba haka bor jong u, kum u myntri ka tnat Labour ula pynmih ka hukum ban ai shuti Maternity Leave ne shuti kyrpang haka por pun khun kha khun ïa ki nonghikai kynthei.

U Bah Prestone Tynsong u la pynpaw ïaka jingbitar jong u ïa kiwei pat ki party hapoh ka lama jong ka MDA kiba ïathiah lang ïa im lang ha kine ki 5 snem bala leit kiba kynnoh pop tang ïaka NPP marwei na bynta kino kino ki ishu ha ka jylla.

Halor jingkynthoh High Level da kiba bun balang, u Deputy Chief Minister ka jylla ula ong ba ula ju kyntu man ka por ban ujor da ka FIR pyrshah ïa kita ki High Level khnang ba ka sorkar kan leh eiei hynrei ym don mano mano ba ujor FIR haduh mynta.