Kylla ka bus night super ha surok NH 06 ha Umling, lait thaw ki mynsiem briew

Syllad | The Rising MeghalayaOctober 16, 2024

Kiba bun ngut ki nongleit nongwan ki la lait thaw na ka jingma hadien ba kawei ka bus Night Super kaba ki shong ka la kylla khongpong hapdeng ka surok bah NH-06 ha ka shnong Umling ha Ri Bhoi District hynne ka step 16 tarik Risaw.

Katkum ki khubor la ong ba kane ka jingjia ka la jia ha ka por kumba 7 baje mynstep katba kane ka bus kaba don ia u nombor ML 05 L 8998 ka dang pynher sted, ha kaba la kynnoh ruh ba u nongniah jong kane ka bus u dei uba la shoh khawiang.

Ha kane ka jingjia watla kam shym la don kano kano ka jingmynsaw ia ki shong hapoh kane ka bus, hynrei ka la wanrah pat ia ka jingdheng kali kaba jur kaba la neh katto katne kynta namar ka jingkylla jong kane ka bus na shilliang surok sha shilliang.                             

Hadien kane ka jingjia ki bor pulit ka Nongpoh Police Station bad na ka Tnad traffic ki la wan poi marmar ha katei ka jaka ban tan noh ia katei ka bus bad ka jingtohkit halor kane ka jingjia ka dang iaid shakhmat.