Kylla kam shoh briew ka jingiaid paidbah ka FKJGP ha sor Shillong

Syllad | The Rising MeghalayaOctober 28, 2022

Ka jingiaid paidbah kaba la khot pynlong da ka Federation of Khasi Jaintia and Garo People (FKJGP) na Motphran haduh madan Iew Rynghep (Fire Brigade) na ka bynta ban dawa na ka sorkar ban shna iaka aiñ halor ka lad iohkam iohjam ki samla kala kylla long pynban kaba huri hura haka sngi Thohdieng

Ha kane ka jingiaid paidbah kala don ka jingia syndong kti bad ka jingsympat da ki lama iaki paidbah ba iaid ba ieng. Ka dur kaba la shaphriang ha kylleng ka dei ka jingshah shoh ki katto katne ki nongniah scooty ha Dhankheti.

Ha kane ka jingjia iashoh iadat uwei na ki nongthoh khubor ruh ula shah tied lama ha ki dkhot ka FKJGP.

Marsien sdang ka jingiaid paidbah ka FKJGP lajan baroh ki dukan barjylla ruh kila khang khyrdep.

Na kaliang u Bah Dundee C Khongsit president ka FKJGP ula pynpaw ka jingsngewkhia halor kane ka jingjia shoh dat iaki riew paidbah. Ula ong ba kane ka rally ka dei kaba jai bad la seng la kraw ia baroh ki dkhot ban long kiba jai jai.

U Bah Dundee ula ong “Ngi shim ka jingkitkhlieh halor kane ka jingjia, hynrei kiba bun ki smala ki dei ki lanot bad kiba duh kam duhjam khamtam haka jingthung kam pulit 2019.”

Kum ki nongialam ula kyntu ia baroh ki samla wad kam wad jam ban long kiba iaishah bad kin rah ia sur jong ki sha ka sorkar. Hadien kane ka jingiaid paidbah la don ka jingialang paidbah ha madan Iewrynghep.

U Bah Dundee haka jingialang ula dawa mardor na ka sorkar jylla ban thung kam ia baroh ki post ba thylli ha ki tnad treikam bapher bapher. “Ngi lap ba ki don haduh 7653 tylli ki post kiba thylli, kumta ka sorkar ka dei ban thung mardor ia ki jaka ba thylli katkum ak RTI,” la ong u Bah Dundee