Kylleng ki shnong la leit bret ïaki ñiut na Jowai, mynta ha Tuber Kmaishnong

Syllad | The Rising MeghalayaApril 1, 2022

Ka Dorbar Shnong Tuber Kmaishnong hadien ba la lap ki trai shnong ia ka jingbret pathar ka Jowai Municipal Board (JMB) ïaki ñiut ki ñier ha u lum Iaw Raja uba hap hapoh u pud u sam ka shnong shisyndon kala ujor bad pyntip sha u Deputy commissioner, East Jaintia Hills District, Khliehriat ban tuklar ia kane bad dawa ban phah wan kit biang ïa kine ki ñiut.

U Waheh Shnong bad Secretary Shnong Tuber Kmaishnong kiba kynthup ia u Ma J Sana bad u M Lyngdoh kila iathuh ba ka ka JMB ka la ai ding ia kine ki ñiut bad la lap shuh shuh ba ki skaiñ u pyrjong ki la mih bad kha khun pylleng hangne. “Kane ka jingleh ka JMB kan wanrah shibun ki jingpang bad kan pynjaboh ia ka um ka wah namar sharum don bun ki lyngkha ba ki nongrep ki thung ki bet,” la ong kine ki nongialam shnong.

Ka Dorbar Shnong Tuber Kmaishnong lyngba u DC kala kyrpad ia u ban bthah ia ka JMB ban kit biang ia kine ki ñiut, lym kumta ka Dorbar Shnong kan shim ka rai ba tyngeh.

Kumban shu pynkynmaw ba JMB haduh mynta kam pat ioh satia iaka jaka bret ñiut ba pura naduh ba kala sangeh ban bret ha Mynkjai, bad mynta kala pyndonkam iaka buit khliehshrieh bad bret pathar kylleng ki jaka ïa kine ki ñiut kaba la wanrah ka jingpyrshah kaba jur.