Kyndang ka Assam ia ki iing beain ha surok Jorabat-Byrnihat, peitngor ki sengbhalang ka Jylla

Syllad | The Rising MeghalayaSeptember 6, 2024

Ka Sorkar Assam ka la kyndang naphang ia ki ki spah tylli ki dukan bad iing ki sem kiba la tei beain ha jaka ka PWD kiba don ha ka liang Assam, kata naduh Jorabat ter ter shaduh Byrnihat.

Kane ka jingshah kyndang naphang jong ki dukan bad iing kiba la shna beain ha ki jaka sorkar ka la sdang ha ka 5 tarik Nailur ha kaba ki bor sorkar ka Assam ha ka jingdon lang ki Magistrate, ki heh Pulit bad ki CRPF, ki la rah da ka kali puh shilum ban kyndang  ia ki dukan bad ki iing ki sem.

U Ringku Deka na ka shnong 13mer sha ka liang Assam u la iaroh ia ka sorkar Assam kaba la nud ban shim ia katei ka sienjam ban kyndang naphang ia kitei ki dukan bad ki iing kiba la shu tei beain ha shilynter ka surok na Jorabat shaduh Byrnihat.

U la ong ruh ba ia kitei ki dukan bad ki iing ym ithuh ithaw shuh ba ki dei ki jongno bad ha kajuh ruh ka por ba ki briew kiba shong ba sah ha kitei ki jaka ym tip shuh ba ki dei kiba na kano ka jaka.

Nalor kata u la ong ruh ba ki don ki riew shim kabu kiba ju leit lum pisa na ki nongshong dukan ha kitei ki jaka ka sorkar ha kaba ki ju lum pisa ha ka dor T. 50 haduh T. 200 kawei pa kawei ka dukan ha kyrteng ka sorkar Assam.

Na ka liang ki sengbhalang ka Jylla kiba kynthup ia ka FKJGP bad KSU Byrnihat Circle haka 6 tarik Nailur ki la pynpaw ka jingbym shngain namar kitei kiba la duh lut ia ki iing ki sem ne ki dukan ki lah ban wan wad jaka rieh tngen sha Meghalaya khamtam namar kane ka jaka ka don ha khappud ka Meghalaya bad Assam.

Kine ki ar seng ki la shim ruh ia ki sienjam ban peitngor bha halor kane ka jinglong jingman khnang ban lah ban khanglad ia ka jingwan rung beain jong kine ki briew sha u pud u sam ka Jylla.

Na ka liang u Vice President ka FKJGP North Khasi Hills District bad u Samla Maitlynti Klei, General Secretary ka KSU Byrnihat Circle ki la kyntu ruh naduh ia ki bor shnong, ki samla, ki paidbah nongshong shnong, ki nongaiwai iing ba kim dei ban pdiang lada kine ki briew ki thmu ban riehtngen ha ki shnong ki thaw.

Ki la ong ruh kumba la paw la sngewthuh ba kitei ki briew ki dei ki bym don satia ia ki kot ki sla bad ki dei ki poiwir bad dei namar kane ka daw ka sorkar Assam ka la kyndang ia ki dukan bad ki iing ki sem namar ka jingwan shong beain.