Kyndang ka Tnat Excise ia ka karkhana shna kyiad beain ha Byrnihat, kem 14 ngut

Syllad | The Rising MeghalayaJune 26, 2024

Ki pulit ka Tnat Excise ha ka janmiet 25 tarik Jylliew hapoh ka jingialam jong u Superintendent Excise ka Ribhoi u Bah RC Lyngdoh ki la leit ban khynra ia ki katto katne ki karkhana ha thain Byrnihat ban wad ia ki  briew kiba donkti ha kaba pynmih ia ka kyiad  phareng beain bad ioh ban kem noh ia 14 ngut  kiba donkti.

Ha kane ka jingleit khynra kane ka Tnat ha ryngkat ka jingiarap lang da ki briew ka Excise na Assam ki la lap ia kawei ka karkhana kaba la shu khang khyrdep naduh ba wan ka khlam Covid 19 bad kaba dei ka karkhana barim ba pynmih cachew nuts kaba hap ha ka shnong Rajabagan ha kaba la lap ba ka la kylla long pynban kum ka karkhana shna kyiad khlem laisen kaba la trei khlem salia bad kaba ym don ba tip.

Na ka liang u Rangbah Shnong ka Rajabagan u Bah Anant Timung u la ong ba na ka liang jong ki ruh kim don jingtip eiei halor kane namar ka dei ka karkhana kaba la khang naduh u snem 2018, bad na ka liang ka shnong ruh ka la khein beit bym don eiei shuh bad shu kylla kudam buh tiar bad khlem da ai shuh ia kano kano ka NOC.

Hynrei u la pynpaw ka jingkyndit ban shem ba kane ka karkhana ka la kylla long pynban ka jaka shna kyiad beain tad hadien ka jinglap da ka Tnat Excise. Nalor kata u la ong ruh ba um ithuh satia ia ki briew kiba trei ha kane ka jaka.

Katba u Bah RC Lyngdoh Superintendent ka Tnat Excise Ribhoi u la ong ba hadien ba la ioh ia ka jingtip kaba thikna ba ki don ki karkhana pynmih kyiad beain kiba khlem laisen ne rejister, kumta ha  ryngkat ka kyvhun bad ki briew ka Tnat Excise na Asaam ha ka por kumba 3 baje eiei ki la sdang ban khynra  ha ka thain Rajabagan, Byrnihat.

Ha ka jingkhynra ia kawei ka jaka kaba ki la i shan khmat ki la ap shisha ia kane ka kam shna bad song kyiad beain bad kurup noh ia baroh ki tiar ki tar bad kem ruh ia 12 ngut ki nongtrei bad arngut ki nongkhmih ia kane ka jaka.

Na ka liang u Bah Lyngdoh u la ong ba ka jingmih jong kiba kum kine ki karkhana ba beain ki wanrah ka jingduh noh kaba khraw ia ka iarong jong ka sorakr Jylla. U  la ong ruh ba ka Tnat kan pynlong ia ka jingtohkit kaba bniah bad ban phah leh ruh ia ki test ha kaba iadei bad ki jingkhleh kiba ki la pyndonkam ha kane ka karkhana kaba beain.