Kyndang ka Tnat Forest ka Assam iaki Khasi Pnar na ki shnong Khasi ha Cachar Hills 

Syllad | The Rising MeghalayaSeptember 1, 2023

Ka Tnat Forest ha ryngkat ki bor district ka sorkar Assam hynnin ka sngi Palei kila leit ban kyndang naphang ia ki jaidbynriew Khasi-Pnar kiba shong ba sah ha ki shnong Khasi kiba hap hapoh ka Pahar Line ka Cachar District mynta lah da ki spah snem.

Ha kane ka jingwan khynra ki briew jong ka tant forest ka Assam ki la mait naphang ia ki dieng kwai, ki tympew bad ia kiwei pat ki mar rep jong ki nongshong shnong bad ai syndon ruh da ka hukum ban mih noh ne ka ‘eviction notice’ na kine ki shnong.

Katkum ki jingtip ba la ioh lum la ong ba kine ki shnong Khasi kiba la shah kyndang ha ka tnat Forest ka Assam ki dei kiba la tip kum ka Durgacherra, Durbintilla bad Dabinalla.

Nalor kata katkum ka jingpynpaw da ki trai shnong la ong ba kine ki shnong ki dei kiba la don palat 100 snem bad ki dei kiba la ioh ruh ia ka jingithuh na ki bor sorkar kumjuh naduh u Deputy Commissioner ka Cachar.

Lyngba ki video kiba la saphriang la sakhi ia ka jingiatai nia kaba jur hapdeng ki heh pulit ka Assam bad ki paid Khasi-Pnar kiba dei ki trai shnong ha kane ka jaka.

Katkum ki khubor la ong ba kitei ki shnong ki dei kiba hap hapoh ki jaka ba ki sorbe na ka bynta ka jingtan bording elektrik jong ka Power Grid. La ong ruh ba na ka liang ki nongshong shnong kiba dei ki Khasi Pnar ki la dep tip thikna halor ka jingtreikam jong ka power grid, kumta ki la dawa ban siew bai lutksan ne compensation ha kaba ki la ujor ruh sha ka iingbishar High Court. Ia kane ka bai lutksan na ka liang ki nongshong shnong kim pat shym la ioh satia.

Hynrei, kyndit kyndit kane ka jingjia ka la wan jia kynsan kynsan ha katei ka sngi Palei kaba la wanrah ruh ka jingklumar jingmut kaba jur hapdeng ki nongshong shnong kiba dei ki Khasi Pnar namar kane ka jingleh donbor jong ka sorkar Assam.