Kyndang ne weng shi syndon iaki har rukom ki jingtei hapoh 50 meter na Wah Myntdu

Syllad | The Rising MeghalayaSeptember 27, 2022

U Chief Secretary ka sorkar jylla u bah D.P Wahlang (IAS) uba bthah ban kyndang ne ban weng shisyndon ia kino kino ki kynja jingtei kampher lada dei ki iing ki sem ne kino kino kiba don hapoh ka 50 meter na ka wah Myntdu.

Ia kane ka hukum, na ka liang u bah Wahlang ula pynmih ha ka jingleit ban lum ia ka jingialang (review meeting) kaba la long ha ka ophis treikam jong u  Deputy Commissioner, West Jaintia Hills District, Jowai, hynne ka sngi ba ar.

Kane ka hukum na u bah Wahlang kum u Chief Secretary ka dei hadien ba u la khmih bniah ia ka rukom pyntreikam ia ka hukum ba la pynjari ia ka da ka National Green Tribunal (NGT) katkum ka mukotduma O.A. 172/2016/EZ, u Sajay Laloo pyrshah iaka sorkar Meghalaya.

Haba iadei bad kane, na ka liang u  bah Wahlang, u la bthah ia ki bor synshar jong ka distrik, nangta ia ka Jowai Municipal Board bad kumjuh ia ka Urban Affairs Department  ba kin pyrkhing bad teh lakam bha noh nangne shakhmat bad ba kidei ruh ba kin bud ryntih ia ki kyndon ain jong ka NGT, haba iadei bad ka jingpynkhuid ia ka wah Myntdu, ban ialeh ban pynioh kloi ia ka jaka kaba kyrpang ban bret niut ia ka sor Jowai bad kaba donkam lei lei ka long ba hapoh ka 50 meter jong kane ka wah lada don kino kino ki jingtei kum ki iing bad kiwei kiwei dei ban weng bad kyndang noh shi syndon ia ki.

Shuh shuh u bah Wahlang ula pynkhamti ha u Deputy Commissioner ba un hap ban shim khia ban khmih ia ki jingpyntrei kum ia ka bio-remedial, Faecal Sludge, Septage Management Treatment Plant, waste recovery centres, ha ka juh ka por ban khmih ba ki thliew iing kim dei ban iaid lait ban khlem da shna ia ki septic tank ki jong ki ha Jowai.

Kiwei kiwei kiba iadonlang ha kane ka jingialang ki kynthup ia u MR Synrem, IAS, Commissioner and Secretary, Urban Affairs Department, Ethelbert Kharmalki, IAS, Director, Urban Affairs Department, BS Sohliya, IAS, Deputy Commissioner, West Jaintia Hills District, RS Gill, IFS, Principal Chief Conservator of Forest and Chairman, MSPCB.