Kyndit ka BJP ba mih noh ka HNLC na ka jingiakren iasuk, kyntu wanphai biang

Syllad | The Rising MeghalayaJanuary 4, 2024

Ka Seng Bharatiya Janata Party (BJP) haka sngi Palei ka pynpaw ka jingsngew kyndit bad sngewkhia jur halor ka jingweng noh jong ka Seng Hynniewtrep National Liberation Council (HNLC) na ka jingiakren iasuk bad ka sorkar pdeng kumjuh ka sorkar jylla da kaba kyntu ba kan wanphai pat sha kane ka lynti jingiakren.

Haba kren sha ki lad pathai khubor u National Vice President ka BJP uba dei khmih ruh ia ka party ha Meghalaya u Dr Chuba Ao u la ong, “Ngi kyrpad ia kane ka kynhun kieng atiar ba kan wan shakhmat bad pyniasoh ha ka lynti kaba dei bad ban pynioh pat ia ka jingsuk.”

Katba u state president ka party u Rikman G Momin u la ong, “Ngi donkam ia ka jingsuk kumta ngin kyrpad ia ka seng HNLC ba kan wan shakhmat ban pynlong ia ka jingiakren iasuk kaba markhmat bad ka sorkar jylla ne sorkar pdeng.”

Kumjuh u nongaiktien ba halor ka BJP ka jylla uba dei ruh u heh pulit IPS barim u Bah M Kharkrang ha ka jingkren u la ong ba ka party ka pynpaw ka jingkyndit kaba khraw halor kane ka jingshim rai ba kynsan jong ka HNLC ban weng noh ia lade na ka jingiakren iasuk bad ka sorkar.

U la ong ruh ba ha ka jingsngew ka jong u, kan ym lah ban long ia ka sorkar ba kan shu weng ne pynkut noh mar mar ia baroh ki case pyrshah ia ki nongialam bad ki dkhot jong kane ka kynhun.

“Lada phi phai sha ka jingthoh ka mat ba kongsan jong ka seng HNLC ka long ban weng noh ia baroh ki case pyrshah ia ki nongialam bad ki dkhot jong ka. Nga sngew ba ki dei ban ap halor kane namar kam long kaba suk ia ka sorkar ba kan shu weng noh ia baroh kine ki case khamtam lada dei kiba la chargesheet bad kiba la shim bishar hapoh ki iingkashari namar shisien ba la dep chargesheet ka shong pura ha ka rai jong ka kashari,” ong u Bah Kharkrang.

“Ha kajuh ka por ngi dei ruh ban pyrkhat ha kaba iadei bad kito ki lanot ha kiba kum kine ki case, ki lah ban dei kiba haiing hasem ki jong phi, mynta lada ka sorkar tang ban shu pynhun liang kan weng noh ia baroh ki case, kaei pat ka hok kaba phin ai sha ki lanot halor ki case kam bymman,” u la ong shuh shuh.