Kyndit ka KSU ba la pynwai ia ka public hearing shwa ka por ba dei ban pynlong ha Brishyrnot EJH

Syllad | The Rising MeghalayaAugust 26, 2023

Ka Khasti Students’ Union (KSU) haka 25 tarik Nailar kala leit sha shnong Brichyrnot da ka jingthmu ban iashim bynta ha ka jingpynsngew paidbah ne Public hearing ba la khot pynlong da ka MSPCB halor ka jingthmu ka M/s Green Valley Industries Ltd ban ioh tih maw (Shale Mining) ha Brishyrnot, East Jaintis Hills, hynrei ka la pynpaw ka jingsngew kyndit ban lap ba ka jingialang ka la dep wai.

Ka KSU ka pynpaw ka jinglyngngoh ba watla ka la poi ha katei ka jaka ha ka por 11:00 am thik, hynrei  la ioh jingtip ba ka hearing ka la wai. Kata ka mut ki sdang 10:00am, katba katkum ka jingpyntip ne ka notification la ong ba yn sdang ha ka por 11:00am.

Na ka liang ka KSU kam shym la ioh lad shuh ban ia shim bynta ban pynsngew ia ka jingthmu ha kaba iadei bad ka jingshahktah ne ka jingbymktah ia ka mariang lyngba ka jingtreikam jong katei ka kompeni.

Ka KSU lyngba une u kyrwoh ka la ong ba kane ka jingleh ka State Pollution Board ka don kaei re kaei sha lyndet. Kumta na ka liang ka seng ka la ong ba kan ym lah ban pdiang da lei lei, bad ka MSPCB kan hap ban pynlong biang da kawei pat ka jingpynsngew paidbah.

Shuh shuh ka KSU ka la ong ba bun bah ki paidbah bad  ki riew pawkhmat kiba kwah ban iashim bynta kim shym la ioh lad shuh, bad ki pynpaw ka jingsngew lyngngoh bad sngewdiaw kaba jur halor kane ka bynta.

Haba wad jingtip shuh shuh, na ka liang ka seng ka la lap ba ka dara ne pandal ba la shna dei tang ka dur ne frame, hynrei ia ka hearing la leh hapoh ïingshnong ne community hall.

Kumta ruh na ka liang ka KSU ka maham jur ba lada ka sorkar kan ai clearance ia katei ka kompeni ban khlong khyndew na katei ka jaka bad lada jia ba pynjaboh ia ki um ba don sawdong, kum ka Wah Umtalen bad Wah Lukha na ka liang ka seng kan pynsangeh shisyndon ia ka jingtreikam jong katei ka kompeni.