Kyndit kynsan mih ka khynnah skul ban dawa lynti iaid kjat hakhmat ki nongmihkhmat ha sngi kha u Kpa jong ka Ri

Syllad | The Rising MeghalayaOctober 3, 2019

JOWAI: “Ngi dei ki khynnah skul bad ngi donkam ïaki Footpath ne ki lynti iaid kjat na ka bynta ban lait na kino kino ki jingmynsaw lada iaid ha surok haba ngi leit skul wan skul,” la ong  kawei ka khynnah skul jong ka HK Singh Memorial Secondary School.

Kane ka khynnah skul kaba kyrteng ka Wakanirin Manki Shullai kala pan bor na ki nongmihkhmat bad ki bor pyniaid district ban kren haka jingialang rakhe ïaka sngi kha ba 150 snem u Mahatma Gandhi, u Kpa jong ka Ri kaba ka bor district kala pynlong iaka jingpynkhuid shnong.

“Kum ki khynnah skul ngi don ka hok ban ïaid na ki footpath ban lait na kino kino ki jingmynsaw mynsnam ha lynti syngkieng, hynrei kaba sngewsih ha shi lynter ka Iawmusiang la kam trai da ki nongdie jingdie ïa kine ki jaka kaba pynlong ïa ngi ban shitom ban iaid ban ieng haba leit ne wan skul,” la ong kane ka khynnah bad kyntu ïa u ïa u MLA Jowai bad ki bor pyniaid District ban shimkhia halor katei ka kam namar ki footpath ki dei ki lynti ban ïaid briew ym ban shong die jingdie.