Kynjah jar ka NEHU ba khangdam ki samla pule; pynksan u VC halor ka jingthung ia u registrar bad deputy registrar

Syllad | The Rising MeghalayaNovember 7, 2024

U Vice Chancellor ka North Eastern Hill University (NEHU) u Prof PS Shukla ha ka 6 tarik u Naiwieng u la kyntu ia ki samla pule bad ki nongtrei ba kin sangeh noh ia ka jingiakhih ka jong ki da kaba pynpaw ruh ba ka jingweng ia u Registrar, Deputy Registrar (Academics), ka dei ka kam ka bym lah ban leh bad shim da ka rai shimet lane ka mon ba shimet.

Ha ka jingpynpaw ka jong u, u la ong ba ka Sorkar ka lah ban rai da kaba thaw ia ka Inquiry Committee ban bishar bniah ia ka jingdawa ban weng noh ia ki na ka kam lada ki suba ba don ka jingleh bym hok halor ka jingthung kam ia ki.

U la pynthikna ba ka eksam thungkam ia ki nongtrei non-teaching staff kan sa sdang noh tang mar ia plie ia ka ophis jong u Registrar, namar la khang ia ka na ka daw jong kane ka jingiakhih kaba dang iaid shakhmat.

Baroh ki kam ki jam hapoh kane ka skulbah NEHU ki la sangeh lut baroh bad kynjah jar jar hadien kane ka jingiakhih jong ki samla pule bad ki nongtrei non-teaching staff.

Katba ki samla pule hapoh ka lama jong ka North Eastern Hill University Students Union (NEHUSU) ba la kyrshan da ka Khasi Students Union – NEHU Unit ki la pynlong da ka jingshah thngan kaba khlem pud bad khot da ka jingkhangdam ia ka NEHU baroh kawei kum ka dak ban pynpaw pyrshah halor ka jingbym lah ban weng ia u Registrar, Deputy Registrar (Academics), Officer on Special Duty (Director, College Development Council) and Guest House In-charge, ki Nongtrei non-teaching staff hapoh ka lama jong ka NEHUNSA ki la pynlong ia ka jingsangeh treikam kaba lai sngi kynthih ban pynpaw pyrshah halor ka jingpynslem halor ka jingkyntiew kyrdan bad ban pynlong ia ka eksam thungkam na ka bynta ki kam bapher bapher kiba la pynbna naduh u bnai Naiwieng 2023.

Haba kren sha ki lad pathai khubor, u Prof Shukla u la ong, “Ka jingweng ia u Registrar, Deputy Registrar (Academics), kam dei satia kaba lah ban leh tang da ka rai marwei ne ka mon ba shimet. Kine ki ophisar ki dei kiba la thung hadien ka jingbishar bniah bad lyngba ki interview. Ki kam jong ki bad ka jingshakri ka jong ki ka dei kaba iaid katkum ki kyndon bad ym da ka rai jong kano kano bor kynthup ia u Vice-Chancellor.”

Da kaba pynpaw ba ki Seng kum ka NEHUTA, NEHUNSA, bad NEHUSU ki la thoh sha ka Sorkar kynthup sha ka President ka Ri India, u VC u la ong, “Lada ka Sorkar ka suba ia kano kano ka jingleh bym hok, ka lah ban thung da ka Inquiry Committee ka ban shong bishar halor kane ka kam.Hynrei, ia mynta kam shym la don kano kano ka jingaiktien na ka liang ka Ministry lane ka ophis ka President sha ka ophis u Vice-Chancellor ban pynpaw halor kane ka phang.”

Ha kaba iadei bad ka kam OSD (Director, College Development Council), u Prof Shukla u la ong, “Nga la iakren ia kiba bun ki Professor na ka bynta ban shimti ia kine ki kam hynrei ym shym la don kiban pynpaw ia ka jingdon mon.”

U la kular ruh da kaba ong, “Nga dang long la kloi ban thung ia kino kino ki Professor kiba kloi ban trei kum ki Director ka College Development Council bad ia ka Guest House Incharge, ka NEHU ka dang sakhi ia ka jingduna jong ki nongtrei.”

Halor ka mat ba la dawa da ka NEHUNSA ha kaba iadei bad ka jingslem ban thung kam ia ki nongtrei, u Prof Shukla u la ong, “Watla ka National Testing Agency (NTA) ka la kyntait ban pynlong ia ka eksam thungkam, hynrei ngi la khot tender ia kiwei pat ki Agency ha kaba ki don bun ki Agency kiba don mon, bad mar ia plie ka ophis u Registrar ki file kin sa iaid shakhmat.”

Halor ka jingdawa ban thung Pro-VC ha baroh artylli ki campus ka NEHU, ha Shillong bad Tura, u VC u la kular ba un sa thung ia kine ki Pro VC hapoh u bnai Nohprah, kata lada kam don kano kano ka jingaiktien na ka Sorkar Pdeng ban pynshai halor kane ka kam.

Na ka liang u VC u la pynpaw ruh ba un sa khot iakren mardor ia ki samla ba pynlong jingiakhih kumjuh ia ki nongtrei ban iakren ia pynbeit ia ki jingdawa ki jong ki. Katba halor ka jingdawa hiar shuki pyrshah ia u, u Shukla u la ong ba um pat long uba kloi ban hiar shuki noh namar la thung ia u da ka President ka Ri India bad ba un bud ia ki rai ki ban sa shim da ka President.”