Kynjoh 4 ngut kiba shah kem halor ka jingjia shah pyniap ba triem ha Umpleng East Jaintia Hills

Syllad | The Rising MeghalayaJuly 20, 2024

Haduh mynta ki bor pulit ki la ioh ban kem noh ia sawngut ki briew kiba la shah suba donkti halor ka jingjia shah pyniap ba triem jong ki sawngut ki briew hapoh ka shnong Umpleng, East Jaintia Hills, ha kaba ia ki metiap jong ki la lapdien ha ka 6 tarik Naitung 2024.

U Superintendent of Police ka East Jaintia Hills lyngba u kyrwoh ba la pyllait ha ka 20 tarik mynta u bnai u la ong ba kim pat lah satia ban pyllait ia ki kyrteng jong kine ki briew kiba la shah kem khnang ba kan ym pynthud ia ka jingtohkit.

U la ong ruh ba ka jingtohkit mynta ka dang iaid shakhmat khnang ban lapdien bad ban ioh kem ia kiwei pat ki briew kiba donkti ha kane ka kam pyntriem.

Lah ban kdew ba kine ki sawngut ki briew kiba la shah pyniap dusmon da kaba shah teh lang hajuh ia ki kti ki kjat bad shah pom da ki kynja wait na ki khlieh bad ryndang ki dei kiba la tip kyrteng kum u Nazar Kyndait (33) na Dkhiah East, u Ravi Rai (23) na Elam, Nepal bad u Rajesh Rai (26 snem rta) na ka shnong Dharan Sunsari, Koshi Anchal, Nepal katba ia ka metiap jong uwei pat ym pat shym la don ba wan kam kat haduh mynta.