Kynjoh 97 percent ka jingai tika iaki 45 snem bad la dep ai tika ki nongniah kali kamai bad dukan ha Madankynsaw Mowkyndeng

Syllad | The Rising MeghalayaJune 28, 2021

U Dr E Lytan Medical & Health Officer, Laskein, ula pynbna ba ka shnong Madankynsaw, Mowkyndeng kala kynjoh sha ka 97 percent ka jingai tika COVID-19 ki nongshong shnong kiba la 45 snem shaneng haka sngi Nyngkong.U Dr

Ia kane ula iathuh haka jingialang pynshai paidbah halor ka jingai tika COVID-19 la pynlong ha ophis u BDO Laskein kaba la iadonlang u BDO Laskein, U Dr. BS Langbang, Waheh Shnong Madankynsaw u Ma Danny Shadap.

Kane ka jingpynshai paidbah halor ka tika COVID-19 ka long na ka bynta ki nongialam ka Village Covid Management Committee, ki nongialam niam, ki nongialam Village Organization bad kiwei kiwei.

U Waheh Shnong Danny Shadap ula ai khublei iaki doktor bad ki nongshong shnong kiba la iatreilang ban iada na ka jingpur ka khlam COVID-19. U Waheh Shnong ula pynthikna ruh ba ki nongniah kali bad ki nongshong dukan ruh kila dep ban ai tika lut ha ka shnong Mandankynsaw, Mowkyndeng.

Ula ong shuh shuh ba ha kine ki kyndiat sngi ka shnong kan kot sha ka 100 percent ka jingai tika hadien bala pyndep iaka jingai tika iaki 18 snem shaneng.

U BDO Laskein, U Dr. B S Langbang ula ai ka jingiaroh iaki nongialam shnong ka Madankynsaw Mowkyndeng kiba la tynrong halade iaka jingkitkhlieh ban iatreilang bad ka tnad ka koit ka khiah bad kino kino ki kam kiba dei bad ka sorkar.

Ka Madankynsaw kanlong ka nuksa ia kiwei ki shnong kiba don ha Laskeiñ Block ban bud iaka nuksa jong ka khnang ban tem bad iada na ka jingpang khlam COVID-19.