Kynjoh ka Shangpung Govt UP School ia u mawmer ba 100 snem
Ka Shangpung Govt. Upper Primary School, Shangpung haka 16 tarik Naiwieng ka la rakhe ia u mawmer ba 100 snem ka jingiaid lynti jong ka na ka bynta ban sam iaka jingnang jingstad hapoh ka shnong Shangpung bad ki shnong ba marjan. Ia kane ka jingrakhe 100 snem na centenary jubilee la pynlong ha phylla jong ka skul.
Ia kane ka skul la seng ha u snem 1924 da ka Welsh Presbyterian Mission bad la ai kyrteng kum ka Welsh Mission Middle English School Shangpung.
U kongsan uba iadonlang ban lehkmen ha kane ka jingdap 100 snem ka Shangpung Govt UP School dei u Myntri ka tnad Water Resource, Food & Civil Supplies bad MLA Raliang Ma Comingone Ymbon uba la shim iaka bynta ban pynher iaki baloon bad buh ia u maw sah kynmaw iaka jingiaid lynti ka skul.
La iadonlang u Chief Engineer PWD (Roads) ka sorkar jylla Ma D Langstang uba la pyllait paidbah iaka souvenir, ka Jt. Director of School Education & Literacy bad Incharge SDSEO West Jaintia Hills District Kong AP Syiem, ki ophisar sorkar nalor kiwei kiwei.
Ka Kong E Suiam Assistant Teacher ka skul kala iathuh iaka histori jong ka Shangpung Govt. Upper Primary School kaba la sdang da ka Welsh Presbyterian Mission bad la ai kyrteng kum ka Welsh Mission Middle English School Shangpung.
Ka shnong Shangpung kadei kawei na ki lyngkha treikam jong ka Welsh Presbyterian Misson ha kito ki por bad shwa ban seng iaka M.E School, ka Mishon ka la sdang lypa iaka Upper Primary School hapoh ka shnong bad ha ujuh hi u snem la pynkiew kyrdan iaka sha ka M.E. School da kaba sdang iaka class VI, kala ong.
Kala iathuh shuh shuh ba u Babu Soso Tham uwei na ki myllung bad u nongthoh kot Khasi ba pawnam bha ula long u nonghikai ha kane ka skul ha ka por jong ka Welsh Mishon, ha kaba la ngeit ba lehse namar ka jingitynnad jong ka shnong Shangpung ryngkat bad ki lum ki them kiba itynnad ithiang kala pynkhih haka jinggmut jingpyrkhat jong u ban long u myllung Khasi uba pawnam tam.
Shuh shuh ka histri ka iathuh ba shnong Shangpung ha katei ka por la tip iaka kum ka Educational Hub ha Rilum Jaiñtia ha kaba ki khynnah na jngai bad najan kumjuh wat na Mikir Hills Karbi Anglong ki wan pule ha kane ka skul.
Ka kong Suiam kala ong ruh ba u snem 1925 u long ka mawmer ba kongsan tam ha ka histori jong ka skul namar dei ha une u snem, haka 26 tarik Risaw ka skul ka la ioh ia ka jingithuh, nalorkata udei ruh u snem ba kongsan namar ka skul haka sien kaba nyngkong ne 1st Batch kala phah ia uwei u khynnah skul uba kyrteng u Dio Lewis Hadem ban iakhun iaka ME Scholarship bad ka School Leaving Certificate bad ula wan haka kyrdan 4th position bad hadien ula kylla long ruh u Headmaster ba hynriew jong kane ka skul ha u snem 1941.
Naduh u snem 1941 iaka skul la shimti ban pyniaid da ka Shangpung Presbytery lyngba ka jingkyrshan iarap ka Welsh mission hynrei namar ka jingsdang jong ka thma bah ba ar, ka jingiarap kala sangeh noh bad ban pyniaid iaka skul la kitkhlieh noh da ka presbytery hynrei namar ka jingduna pisa ban pynbiang tulop iaki nonghikai kumta ha u snem 1949 u Borsing Gympad uba long u Deputy Inspector of school Khasi & Jaintia ula pynmih iaka hukum kaba la mang 50 tyngka shibnai ryngkat ka D.A sha baroh ki nonghikai bad kane kala pynsting iaka jingkit bakhia jong ka presbytery.
Ha u snem 1956 ka skul ka la kylla long ka skul sorkar kaba pura bad la thied jaka ruh ha Shangpung Moolibang na ka bynta ban tei iaka iingskul kaba thymmai.
Ka skul ka pynpaw ruh ka jingkmen ba lyngba ka jingiarap jong u Local MLA Ma Comingone Ymbon, ka tnad PWD Building Jowai Division bad ka PWD Roads Shangpung Division kila pynpra noh ïa ka ïing skul barim bad ka jingshna ia ka madan ialehkai basketball, ka kynroh ryngkat bad ka jingker pud bad ka jingpynbha iaka surok ban leit sha skul.
La pynphuh pyphieng iaka jingrakhe da ki jingshad jingrwai ba la shim bynta da ki khynnah skul, ki past pupils bad na ka Shlem Ki Sur Tynre Shangpung.
Facebook
Instagram
Youtube
Twitter
Leave a Reply