Kynmaw burom iaka sngi kha u Mahatma Gandhi, pynkhuid shnong ha Jowai, Khliehriat, Moolamylliang, Raliang

Syllad | The Rising MeghalayaOctober 2, 2020

U Myntri Rangbah jong ka Jylla u Conrad K Sangma kum ka dak ban kynmaw burom iaka lyngkhuh sngi kha ba 151 snem u kpa jong ka ri India, U Mahatma Gandhi ula buh syntiew ha u mot sahnam jong u ha Main Secretariat mynta ka sngi.

Katba ha rilum Jaintia pat ki shnong bapher bapher bad ki bor district jong ka East bad West Jaintia Hills ha ryngkat ka jingiatreilang jong ki dorbar shnong kila pynlong iaka jingpykhuid shnong.

Ha Jowai ka bor synshar district ha ryngkat ka jingiatreilang bad ka Jowai Municipal Board (JMB) ka Dorbar Shnong Tympang, Iawmusiang, CNI, Seinraij Jowai, ka tnad Police bad ki nongshong die jingdie ha Iawmusiang, ki nongniah kali kamai bad kiwei kiwei kila shimbynta shitrhem haka jingpynkhuid iaka Iawmusiang.

Ha Khliehriat ruh ka bor District ryngkat ka jingiatreilang ki shnong kila pynkhuid iaka shnong Khliehriat, Ladrymbai, Dkhiah bad kiwei kiwei. La iashimbynta da ki Pulit ka District, ki Waheh Shnong, ki Scouts, Guides, NSS, ki nongshong dukan, ki shnong ba hap hapoh ka Khliehriat Dkhiah-Ladrymbai bad kiwei kiwei.

Ka Dorbar Shnong Moolamylliang ruh kala snohktilang ban kynmaw burom iaka Gandhi Jayanti bad kala pynlong iaka jingpynkhuid shnong.

U Ma Apmon Pachiang, Waheh shnong Moolamylliang u iathuh ba la sdang ban pynlong iaka shnong Moolamylliang kum kawei na ki shnong kaba khuid naduh ka snem 2014 bad dei ruh ha kane hi ka snem ba la sdang ban thung iaki dieng bad dang iai bteng haduh mynta.

U Dr. R. Pyrtuh, BDO Saipung Block, u la ai ka jingiaroh iaka shnong ba ka la long kawei na ki shnong ba khuid bad itynnad hapoh East Jaintia Hills  ryngkat ka jingdon ki dieng ba la thung sawdong jongka bad ai mynsiem ruh ia ki briew ha kane ka shnong nang iai bteng ia kane ka jingkhuid. Ula ong kane ka shnong kan long ka nuksa ba kiwei ki shnong kin bud ban pynneh pynsah iaka jingkhuid jingsuba ka sawdong sawkun ka mariang.

Ha Raliang, ki Self Help Group ha ryngkat  ka dorbr shnong Raliang kila pynlong ka jingpynkhuid shnong haka 1 tarik bad kane ka jingpynkhuid shnong la shimti bynta shitrhem da ki longkmie longkpa bad samla sam hoi.

U Waheh Shnong u Ma S. Lamare haka jingkren ula ai khublei iaki SHG kiba la trei shitom ban pynkhuid iaka Shnong. Ula ai khublei kyrpang tuh ia u Ma Thiejhlang Tariang uba la ai sngewbha iaka trok Dumper bad JCB ban pynkhuid iaki ñiut ki ñier kiba don harud ka surok PWD.

Ula ai khublei ruh iaki VDP ka shnong kiba la don bynta haka ban iatreilang haka jingkhuid shnong.