Kynmaw burom ka HNLC ia u nongialam barim ha ka lyngkhuh sngi iap kaba lai jong u

Syllad | The Rising MeghalayaAugust 14, 2024

Ka seng Hynniewtrep National Liberation Council (HNLC) haka 13 tarik Nailar ka la kynmaw burom ia u general secretary barim jong ka u Bah Cherishterfield Thangkhiew ha ka lyngkhuh sngi iap kaba lai snem jong u.

U general secretary-cum-publicity secretary ka HNLC u Bah Sainkupar Nongtraw lyngba u kyrwoh u la ong, “Ngi kynmaw burom ia ka lyngkhuh sngi iap ba lai snem jong u nongialam ba don burom, u nonghikai bad u briew uba iohi jngai u Bah Cherish.”

“Katba ngi dang ia sngewsih halor ka jingduh noh ia u nongialam uba kham pher, ka nam jong u kan dang iai neh. Kumba la leh da ki longshuwa jong ngi, u Bah Cherish u la iehnoh ia ka lynti na ka bynta ka jinglaitluid ka jong ngi. Ki nongshun ki lah ban pyniap ia u da u kuli, hynrei kim lah satia ban pyniap ne pynduh ia ki jingmut jingpyrkhat jong u,” u la ong.

U Bah Sainkupar u la ong ba la seng ia ka HNLC ha u snem 1987 da u Bah Cherish, Sounder Cajee, Founder Cajee, John Kharkrang, Julius Dorphang, Vincent Sangma lem bad kiwei pat kaba kynthup ia u heh shipai barim bad u Manager Bank, bad la pynkylla ia ka HALC sha ka HNLC ha u snem 1992, katba ki para jong ngi, ki Achik ki la thaw ia ka ALMA. “Dei tang u Bah Cherish na ki nongseng jong ka HNLC u bym shym ia pein ia ki nongrim jong u ne ban dei noh ia la ki jong ki briew jong u,” u la bynrap.

Da kaba kynnoh ba kiba bun ki nongialam ba shlur bad ba shemphang jong ka seng ki la shah thombor bad shah pynkylla langknia ha ki bor synshar, u Bah Sainkupar u la ong, “Uwei hadien uwei la pynbiej, la ialam bakla bad pynsngap jar da kaba thied ia ki kaba la pyntlot ia ka nongrim jong ki seng Hynniewtrep, katba ki agent sorkar ki la nang rung bad pynpulom ia ki jingtreikam jong ki. Watla ha ki snem 80 bad 90 la sakhi ia ka sur jingkyrshan jong kiba bun halor ki jingeh bad ki jingjynjar ki jong ngi, hynrei tang khyndiat eh kiba iai neh haduh kine ki sngi.”

“U Bah Cherish u la ong ha nga ba ym don ka spah ne ka burom kaba kham khraw ban ia ka jingpyllaitluid. Dei ma u uba la wanrah ia ka jingmut jong ka jingpyniakhlad bad u la pule bniah ruh ia ka jingialeh jong u Wickliffe Syiem. U Bah Cherish u dei u riew shemphang u bym shym la pyniakhlad ia lade na ki paidbah. U la ioh ia ka kyrteng ‘u nongpynkylla dur’ hapdeng ki katto katne ki nongialam jong ka thain shatei lammihngi (Northeast) namar ka jinglah ka jong u ban treikam ha ka nongbah Shillong ha kaba rieh, kaba la pynklumar jingmut ruh ia ki bor jong ka ain bad bor sorkar,” ong u Bah Nongtraw.

Ha kajuh ka por u Bah Sainkupar u la ther tyngeh ruh ia ka jingbym don jingiatylli hapdeng ki nongialam bad ki riew sain pyrthei jong ka Bri u Hynniewtrep.

“Da kaba shaniah tylli tang ha ki riew sain pyrthei bad kiwei ki riewkhmat ban iakhun ia ka kam jong ka ‘Jaidbynriew’, ngin hap ban ap slem slem. Bun kiba khot ki nongmihkhmat bad ki riew sain pyrthei jong u Hynñiewtrep ki don pisa hynrei kim don ka jingïatylli; kim kwah ban iawan lang ha ka liang ka ioh ka kot ban tei ia la ka jong ka imlang sahlang. Ka pisa kaba ngi pynlut man ka sngi ka iaid tang shisien hapdeng ki nongshong shnong ki jong ngi, hynrei kham bun ka pisa kaba ngi pynlut ka iaid tawiar haduh 19-90 sien ha ki pla jong ki bym dei ki riewlum,” u la ong.

Shuh shuh une u nongialam ka HNLC u pynpaw ruh ka jingsngew bynniaw namar ba ka sorkar kam don ia ka economic blueprint. “Ka sorkar kam don satia ia ka blueprint ha kaba iadei bad ka ioh ka kot; bad ka jingmih na kane ka long ba ki briew jong ngi ki long kiba duk, kiba lah ban shah iuhroit, bad ka Meghalaya ka la kylla long ka jylla kaba shatrai eh ha ka ri India,” u la bynrap.