Kynmaw burom ka Khliehriat District ïa u Kpa ki dak thoh Khasi

Syllad | The Rising MeghalayaJune 23, 2019

JOWAI: Ka Trust Committee jong ka Khliehriat District ryngkat ka jingiatreilang ka tnad pule Khasi jong ka Jaintia Eastern College bad ka Balang Presbyterian Umrasong ha ka sngi Sattjain kala rakhe kynmaw burom ka jingwan ïuhkjat ba 178 u Rev Thomas Jones ha rilum Khasi, u Kpa ki dak thoh Khasi naduh u Jylliew 22, 1841.

Ia katei ka jingkynmaw burom la pynlong haka Balang Umrasong, East Jaintia Hills District ha ka jingialang kaba la pyniaid da Pastor Dwenty Nongtdu ha ka jingiadonlang ki khun ka Balang Umrasong bad ki samla pule ka kolej kumkuh ki dkhot nongkitkam ka Trust Committee.

Ha kane ka sngi ka la don ruh ka Panel Discussion halor ka phang ‘Ka Jingim bad ka Jingnoh Synniang u Rev. Thomas Jones sha kane ka ri lum Khasi Jaintia” bad la iashim bynta ha kane ka Panel Discussion da ki riew shemphang ba kynthup iaka Kong Percia Phawa bad u Lancaster Nongtdu kiba dei ki nonghikai jong ka Jaintia Eastern College, Khliehriat, u Dr. P. Amryngsong bad Dr. P. Nongtdu Primcipal jong ka Jaintia Eastern College.

Kitei ki riewshephang kila iathuh ba u Thomas Jones ula wan iuhkjat nyngkong ha Ri Khasi ha ka 22 tarik Jylliew haka snem 1841 ha Sohra bad ha katei ka por ka Ri Khasi ka dang sahdum kumta u Thomas Jones ula wad lad kumno ban thoh ïaki dak Khasi bad dei lyngba ki dak kiba ula thoh bala lah ban pyniatylli iaka ri bad ka Jaitbynriew ba ki Khasi ki nang ban thoh ban tar.

Kane ka jingleh u Thomas Jones ka la wanrah ka jingkyrkhu haka histori jong ka jaidbynriew ha kiba bun ki liang, ula plie ruh ia ka skul primary ha Mawsmai, Mawmluh bad Sohra.

Hadien ka jingialang ka la don ka jingthung dieng ha u Lum jingtep jong ka Balang Presbyterian Umrasong.