Kynmaw burom ka Synjuk ki Dorbar Shnong Shangpung iaka lyngkhuh sngi iap ba 84 snem u Myllung Soso Tham

Syllad | The Rising MeghalayaDecember 19, 2024

Ka Synjuk ki Dorbar Shnong Shangpung haka 18 tarik Nohprah kala kynmaw burom iaka lynkhuh sngi iap ba 84 snem u Myllung Soso Tham u riewkhraw ka jaitbynriew uba la noh synniang haka thoh ka tar u Khasi.

Iaka jingialang kynmaw burom la pynlong ha madan Basketball Shangpung Mission ba la pyniaid da u Emmitre Iakai Assistant Professor, Shangpung Collage bad la ioh ka jingkren pdiang burom na u RN Suchiang Waheh Shnong Shangpung Mission.

U President Synjuk ki Dorbar Shnong Shangpung Ma Nidayoo Papang ula kren lyngkot halor ka jingiaid lynti jong ka synjuk kaba dei ka Sponsoring Body jong ka Shangpung College. Katba u Principal jong ka Shangpung Collage Dr. DG Lyngdoh bad u Rev. GS Lytan Adviser ka synjuk kila kren lyngkot shaphang ka Shangpung College.

U Dr. Davidson Diengdoh Assistant Professor, Post Graduate, Khasi Dept Jaintia Eastern Collage, East Jaintia Hills District kum u riew shemphang ula kren shaphang u Soso Tham ‘U nonghikai haka jaitbynriew bad ka thor ka tar’.

Ula iathuh ba u Hat Tongper ba na ka shnong Sohkha bad Ka Lynkei Tham na Sohra kila kha ia u Soso Tham u khun marwei shynrang uba lai ha Saitsohpen ha u snem 1873. Ha u snem 1894 ka mission kala phah ia u Soso Tham ban leit hikai noh ha Shangpung, ban iarap de ia u sahep Jenkins kum u missionary. La phah ruh ia u Soso Tham ban hikai ha Mowkaiaw hynrei tang shipor ula wan hikai biang ha Shangpung.

U Soso Tham ula long u Headmaster jong ka Shangpung Upper Primary School 1893. Ha u snem 1903 ula iehnoh iaka kam nonghikai bad long u muktiar haka Court jong u SDO Jowai. Ula mih noh na Jowai namar ba la thung ia u kum u nonghikai haka Shillong Govt. High School ha u snem 1905. Ula shongthait na ka kam hikai haka 30 tarik Jylliew 1931 bad ula khlad haka 18 tarik Nohprah 1940.

Ha kane ka sngi la don ruh ki jingrwai jingshad ba la shim bynta da ka Lummuroo Secondary School Shangpung, Shangpung Collage bad Clearwater Secondary Schhol Shangpung.

Iaka jingialang la pynwai da ki kyntien khublei na u R.H. Wann Secretary ka Synjuk ki dorbar shnong Shangpung.