Kynmaw iaki dak ki shin, phah sumar ha ki Doctor ym ha ki doktor jakoid iaka jingpang bampong

Syllad | The Rising MeghalayaOctober 27, 2022

Ka Disaster and Covid-19 Management Committee bad ka IQAC ka Kiang Nangbah Government College, Jowai ha ryngkat ka jingiatreilang ka Woodland WK Hospital kala pynlong iaka jinghikai ba shisngi halor ka jingpang bampong ne ka Cancer haka sngi Palei.

Ia kane ka jingai jinghikai la pynlong ha auditorium hall jong ka koleg. Ka matpdeng jong ka jinghikai ka long ‘There is a Can in Cancer because we Can beat it” lane lah ban jop iaka jingpang bampong ne cancer da jingsumar.

Ki riewshemphang ha kane ka jingai jinghikai da ki doctor bad nurse na Woodland WK Hospital kiba kynthup ia u Dr. Chanmiki Sayoo, Head & Neck Cancer Specialist bad ka jingpang bampong ha jymbuin (SBE) la batai bniah da ka Sister Wandaroikiru Suchiang.

Also Read | Jop ka Woodland WK Hospital ban sumar ia i khyllung ba ioh iaka jingpang ba kham niar

U Dr. Sayoo uba la batai bniah iaka jingpang bad ki dak ki shin kiba bun jait. Ula ong ba uno uno uba sngew shitom bad ka pher ka rukom shitom u dei ban phah sumar sha ki jaka sumar.

Kino kino kiba don jingshitom ki sngewthuh beit iaka jinglong jingman ka met bad ki dak ki shin ba at haka met, ka jingduna ka jingkhia ne kiew ka jingkhia bad ka jingpher ka rong ka sniehsdoh, ka jingshitom haka ring pynhiar mynsiem, jyrhoh nalor kiwei kiwei ki dak ki shin.

U Dr. Sayoo ula ong ba marsien mih ki dak ki shin, phah sumar mar mar ha ki doctor kiba la dep pule pyntbit halor ka jingpang bampong ym dei ha ki doktor jakoid (quack).

Ka Sister Wandaroikiru Suchiang kala batai bniah iaka jingpang bampong haka jymbuin kiba ki dak ki shin kiba lah ban iohi kidei ka jingngam ki soh jymbuin shapoh, ka jingrben ki soh bad ka jingpang ki soh jymbuin. Lada don kum kine ki dak ki shin mar mar phi dei ban iasyllok bad ki doctor ban ioh iaka jingsumar haka por kaba biang.

Ia kane ka jinghikai la pyniaid da u Vivek Lyngwa bad iaka kyntien ai khublei la ai da ka Madonna Pariat. La iashimbynta da ki samla pule ki nonghikai ka Kiang Nangbah Govt College.