Kynmaw ieit ka AJYWO ia U Kiang Nangbah ha Khliehriat

Syllad | The Rising MeghalayaDecember 31, 2019

JOWAI: Ka AJYWO Central Body bad ka East Zone hapoh ka jingialam u Bah MH Dkhar bad u Bah Heatermoon Ryngkhlem bad kiwei kiwei ki dkhot jong ka AJYWO kila kynmaw burom ïaka lyngkhuh sngi iap ba 157 snem jong U Kiang Nangbah, u Khlawait jong ka Ri Jaiñtia da kaba leit buh syntiew ha u mot dur jong ha Khliehriat.

Kumban shu pynkynmaw ba ïa une u mot la tei da ka AJYWO Central Body ha ryngkat ba ka jingiatrei lang ba ka District Administration, East Jaintia Hills District, ha u snem, 2016 kum ka daw ka ban pynsahnam bad kynmaw ieit ia utei u khun dap shynrang jong ka Ri Jaiñtia.

U Bah MH Dkhar  u la kren lyngkot ha khmat jong utei u Motdur jong U Kiang Nangbah da kaba kynmaw tympang halor ki kam bakhraw bad jinglen-lade jong U Kiangbah Nangbah,  na ka bynta ka Ri bad ka Jaidbynriew, kat haduh ba u la pha ia la ka jong ka jingim na ka bynta ban pynlait luid iaka Ri bad ka Jadibynriew na ka jingshah-tehmraw ha ka ka sorkar nongwei.

“Wat la ka Ri Jaiñtia ka la ioh ia ka jinglaitluid na ka kti ki dohlieh, hynrei kat kumba ka long mynta, ka Ri Jaiñtia ka ia kynduh shibun ki jingeh ha kiwei pat ki bynta ki ba ktah ia ka Ri bad ka Jaidbynriew naduh ka bamsap bampong, ka jingkynrei ki kam sniew bad ka kumjuh ka jingngop ki samla ha u drok,” la ong u MH Dkhar bad la khot la wer ïa baroh ki nongshong shnong ban ïakhun ïaki kam sniew haka imlang ka sahlang da ka mynsiem shlur bad ka jingiatylli.