Kynmoo burom ka Loomkyrwiang Dorbar Chnong yei dap 104 snem i yungwalieh
Ka Loomkyrwiang Dorbar Chnong haka 15 tarik Thohlakhmi da pynman ko ka Sngi Yachemlang wa kyrpang iong ki khon u loom u pdein ha Yungwalieh kam ka dak wow leh burom yei kynjooh 104 snem I Yungwalieh.
Ha ka yalang wa da pynlai da ka Samhakani Laloo, Secretary WWO, LDC da kdar luti da ki kyntien pdiang burom wei suki wa chi minit kam ka dak I kynmoo burom kynmoo maia ya ki waheh wasian, ki manchwa kiwa sein wa dang ya u loom u pdein kamjooh ya ka Yungwalieh neitae pynbood leh ki kyntien ngooh kyntien dem wa da siang da booh da u SD Laloo,
U Lammat-oo Laloo, Waheh Chnong LDC hawa e ki kyntien yahkmat hajrong ka thong iong kani ka sngi da niawtang u ya I por nachwa iwa ka dong ka chnat, u loom u pdein em ko ya ki waheh wasian wa Chynna jngai neitae I kylladur ka dong ka chnat na ki por cha ki por iwa wan dei yakrehlang wei yatylli kam ki khon ka dong ka chnat, u loom u pdein kiwa thrang angnood u wanrah I chongsuk chongsain wei miat I bha ka imlang sahlang.
Chooh chooh kyrsu kyntu wei khutlang u leh ya ki khon ka dong ka chnong deiwa ong, kamwa ka ka Dorbar Chnong em ko chiboon ki kam wa damut damang u kreh neibynta ka imlang sahlang iong ki bru wa chongchnong khlem da wanrah I sniaw yapher, to yakrehlang deiwi I jingmut da kawi ka thong khnang wa iwa miat wabha tam u ioh I ki u ioo u sakhi hapoh u loom u pdein, ka chnong ka thaw iong-i.
Neiliang u Chibor Najiar, Adviser LDC hawa e I klam I kappe kam uwi na ki waheh wasian da ong u, sniawsuk sniawsarong u ong wa ki bru wachong wasah hapoh u loom u pdein toh du ki wa em yatoh wei yajooh yajan na kawi ka kur ha kawi ka kur, na kawi ka manyung ha kawi ka manyung iwa sah toh emkam u thuhlad I kammon u ye I u pynim pynneh pynsh wei pynjanai ya ka Nongrim iong ka Chankylliang ka Rap Kylliang kawa man ka rukom dustur wa da sain nongrim ya ka jaitbru.
Iwa kyrpang chooh chooh pachat u leh ki kyntien snein kyntien kroo ya ki khon ka dong ka chnat, u loom u pdein dei wa ong, yaleh wow yait nei wohdong wohdaw wei sniaw yapher hapyrdi para-I.
Nalor I klam I kappe iong ki waheh wasian da pynkhroo pynkyrpang chooh ya kani ka sngi da I purae u General Secretary ya ka Riti krehkam iong ka Dorbar Chnong kawa da dep pynjanai ha ki waboon ki bynta, I ekti ya ki Mememto kam ka dak wow pynkhroo yei kam wa daleh da ki khon ka Dorbar Chnong neibynta I miat I bha ka imlang sahlang, I ekti ya ka Song poisa cha kiwa embhah u pom ya ka Lucky Draw iong ka Iaw Fete 2024 wei khatdooh da pynkut wan dei purae ya ka Pledge iong ka Dorbar Chnong hei yahkhmat u Daioolang Pakma, Symbood Waheh Chnong.
Facebook
Instagram
Youtube
Twitter
Leave a Reply