Kynnoh ba dkoh ka khynnah ba bakla injek ha West Jaintia Hills

Syllad | The Rising MeghalayaJuly 16, 2023

Kiba haiing jong kawei ka khynnah na ka shnong Niawkmai West Jaintia Hills kila kynnoh ba ka khun jong ki kala kylla dkoh tang namar ba bakla ban ai injection da kawei ka jaka surmar ba pyniaid ki sister ka Sacred Heart Health Centre Sahsniang.

Ha u kyrwoh bala phah ka ong ba haka 10.05.2023 kiba haiing ka kane ka khynnah don jingshit malu mala, kumta ka kmie jong ka, ka la leit ïalam shim dawai na ka Sacred Heart Health Centre Sahsniang.

Ki sister ki la ai injection ïaka bad leit phai noh sha la ïing sha Niewkmai, hynrei hadien  katto katne por ha kajuh hi ka sngi ki ba haïing ki la ïohi, ba kata ka jaka ba ki ai injection ïaka, ka la pher bad ïong ka kjat.

Mar kumta ki la leit pynibiang sha ka Sister ba ai injection sha Sahsniang. Te ka ong ym lei lei ynnai leit sha hospital bad na ka liang ki ba haïing kim sngewhun namar ki la ipher kata ka jaka ai injection bad ki leit ïalam sha Dr. Norman Tunnel Hospital Jowai.

Ha kata hi ka sngi, na ka liang jong ka hospital kim lah shuh ban sumar, kumta ki la phah sha Shillong bad ki ba haïing ki leit sha Nazareth Hospital bad hangne ruh ki ong ba kim lah shuh ban sumar, ki phah sha NEIGRIHMS Mawdiangdiang Shillong bad hangne ki doctor, ki ong hap ot noh ïaka kjat.

Haka 13.05. 2023 ki don lang ki sister na ka Sacred Heart Health Centre Sahsniang bad kita ki sister ki ong ban rah sha Guwahati sha hospital ba kham bha (Appolo Hospital Guahati Assam) bad hangne ruh ki doctor ki ong ba hap ot ïaka kjat bad ki ot noh ïaka kjat haka 20.05.2023.

Naduh ba ki don haka jingsumar ha kino kino ki hospital kita ki sister jong ka Sacred Heart Health Centre Sahsniang ki don lang bad ki ba haïing jong ka khynnah bad ki ong wat sngewsih kin kit khlieh bad kin ia don lang ryngkat bad ki la kular ruh ban kin phah skul pynsumar ïaka kjat ba ot katba donkam.

Haka 04.06. 2023 ki ba haïing ki leit ban pynshisha ïa kane ka jingkular jong ki sister ryngkat bad u President Rangbah ka Seng Kur Shylla Khasi, Jaintia u Pyrkhat Shylla haka jingdonlang ki ba haïing hasem.

Ki sister ki la kular ban phah skul bad ban ai ïaka artificial kjat kat kumba ïaid ka rta jong ka khynnah.

Hadien ba ba la dep iakren bha shaphang kane, ki ba haïing ki la shna ïaka agreement, hynrei kim shym treh shuh ban sign ïaka agreement, te ki khot ïa kren biang haka 20.06.2023 bad ha kata ka jingkren ryngkat bad ki phadar bad sister ki la kyntait ïaka jingkular jong ki.

Ki ba haïing ki kynnoh ba u Phadar Manbha Pakem ula kren tohmet bad u kynnoh ïaki ba ki shim kabu halor ka jingjia ïaka khun jong ki bad u la phah ïaki ban ai ïaki da ka case.

Ki ba haïing ki pynpaw ka jingsngew phylla ban ïohsngew ba kat u Phadar ban kren ki kyntien pynmong ïaka iing ka sem jong ki, kiba la mad ïaka jingjynjar bad um don jingsngew halor ka jingjia ïaka khun jong ki kaba la kylla dkoh baroh shirta tang namar ba ki bakla ban ai injection ïaka.

Na ka liang ka iing ka sem bad ka Seng Kur Shylla Niawkmai, ki pynrem jur ïa kane ka jingkren tohmet jong u Phadar Manbha Pakem ïaka iing ka sem jong ki.