Kynnoh bam sap ia u khaw PMGAY ha Kyndong Tuber, phah tohkit u DC West Jaiñtia

Syllad | The Rising MeghalayaApril 28, 2020

Da ki phew ngut ki nongshong shnong jong ka shnong Kyndong Tuber, West Jaiñtia Hills kila kynnoh ba jingsam ïa u khaw ioh ei naka skim PMGAY kala long kaba thurmur bad kam dei satia katkum ka jingpynbna ka sorkar haka jingthew.

Ka kong Showtheway Pakma kala kynnoh ba ki Fair Price Shop bad ka Vigilance Committee jong ka shnong kila sam ïa u ne khaw ioh ei sha kiba don card NFSA, AAY & PHH tang mar 20 Kg shiiing bad 250 gram u dai haka jaka 5 kg shi khlieh u khaw bad 1 kg shi iing u dai.

“Baroh ki paidbah ki tip ba hapoh kane ka skim PMGAY kin ioh mar 5 kilo shi khlieh u khaw bad 1 kg u dai na ka bynta kawei ka longiing naka bynta u bnai Iaiong (April), pynban ka rukom sam ka long kaba thurmur bad ngim ioh khaw dai katkum ka bala mang ka sorkar,” la ong ka Kong Showtheway Pakma haba kren bad u syllad.com.

Kaba lyngngoh ba rukom sam kam dei satia katkum ka jingdon briew ha ki longiiing, hynrei la shu sam beit tang 20 KG shi iing bad 250 gram u dai kawei ka longiing. Ki don ki longing kiba dei ban ioh khambun u khaw ruh ki ioh tang 20 kg wat la ki don haduh 12 ngut ne 7 ngut shiiing bad ki dei kiba don card NFSA, AAY &PHH.

U Deputy Commissioner West Jaiñtia Hills District, Ma Garod LSN Dykes, haba kren bad u syllad.com ula ong “Nga la ïoh pdiang ïaka jingujor bad nga la phah tohkit halor kane ka jingkynnoh.”

“Ngin hap ban bud ryntih ïaki kyndon jong ka aiñ bad ba u khaw bad dai na kane ka skim u dei ban poi hok sha u paidbah,” ong u DC Jowai bad bynrap ba marsien ioh ïa kane ka jingujor ula phah ïaka hukum sha baroh ki FPS ba ym bit ban leh khlieh shrieh halor kane kam bad kino kino kiba ym lah ban bud ïa ki kyndon jong ka skim kin ngat haka jingpynsaja katkum ka aiñ Meghalaya Foodgrains (Public Distribution System Control order, 2004.