Kynnoh bteng ki Karbi ban pyndik iaki Khasi Pnar ha Lapangap

Syllad | The Rising MeghalayaSeptember 24, 2023

Ka jingpyndik ki nong Karbi ha khappud Meghalaya Assam kala iai bteng ha kaba ha kine ki ar sngi, kata haka sngi Saitjain bad ka step Sngi U Blei la kynnoh ba ki nongshong shnong Khasi Pnar kila shah siat da ki jri siat sim ha ki Karbi haka lyngkha rep jong ki Lapangap.

Uwei u briew uba la tip kum Rijambor Shylla ula mynsaw jur naka bynta ka khlieh bad kiwei kiwei ki bynta jong ka met jong u. Mar mar la rah ia u sha Namdong CHC na bynta ban ai jingsumar.

Haba ïakren lyngba ka phone bad u Waheh Shnong ka Lapangap u Deimonmi Lyngdoh ula ïathuh ba haka sngi Saitjaiñ ki longkmie na ka shnong Lapangap ki la shah siat da ka jri siat sim katba ki dang don ha lyngkha.

Ula iathuh shuh shuh ba kane kala bteng biang haka step jong ka Sngi U Blei ha kaba ki katne ngut ki nongrep ka shnong Lapangap ki la leit peit ïa la u symbai kba haki hali pynthor ba don jaka sha ki khappud shnong bad ka shnong ki Karbi bala tip kyrteng kum ka Tahpat, hynrei syndet syndet haka jingbym poi pyrkhat, la wan her bun tylli ki maw sha ka jaka kaba ki don.

Ula iathuh ba ia kane ka kam la leh da ki nong Karbi kiba rieh tngen ha ki khlaw kiba mar pyrshah bad ki jaka rep jong ki nongshong shnong ka Lapangap.