Kynnoh bthah ki nongialam jaidbynriew Karbi iaki nongrep Pnar ban register iaki jaka sha Assam

Syllad | The Rising MeghalayaJanuary 6, 2025

Sa shisien ki nongshong shnong jong ka shnong Lapangap jong ka West Jaintia Hills District kaba hap ha ka khappud bad ka Shnong Tahpat, West Karbi Anglong District, Assam ki la ngat biang ha ka jingshah pyntieng pynsmiej bad jingshah byrngem byrsit haki nongialam naka jaidbynriew Karbi kiba kam trai ia ki jaka ki puta kiba don ha ka khappud jong ka Shnong Lapangap.

Ha kane ka sien, arngut ki nongrep jong ka shnong Lapangap katba ki dang rep dang riang haka lyngkha jong ki kaba dang hap hapoh u pud u sam jong ka shnong Lapangap ha ka step jong sngi Saitjain ki la kynnoh ba kila shah maham haki jaidbynriew Karbi. La bthah iaki ba kidei ban register iaki jaka rep jaka riang jong ki sha Assam hapoh ar bnai lym kumta kin nym ioh lad shuh ban ot kba ne ban rep ban riang ha katei ka jaka.

Kitei ki nongKarbi ki la kam ialade kum ki nongialam jong ka Karbi Students Association (KSA) bad la ialam ia katei ka kynhun da u President jong ka Socheng Amreng Border Development Commiteee u Augustine Hanse bad katei ka kynhun ka la ong ruh ia kitei ki nongrep ba kim donkam ban siew pisa eiei ban register iaki jaka jong ki ha Assam bad ki donkam ban ai tang u nombar Aadhaar jong ki.

Kitei ki arngut ki nongrep ki la pyntip mar mar ia kane ka jingjia sha u Waheh Shnong jong ki u Ma Deimonmi Lyngdoh bad na ka liang jong u Waheh Shnong u la ai jingtip sha ki bor pulit jong ka jylla Meghalaya.

Haba iakren bad u Ma Lyngdoh lyngba ka phone u la pynpaw iaka jingsngewkhia jong u halor ka jingshah byrngem byrsit jong ki nongrep katba ki dang ki rep dang riang ha ka lyngkha jong ki kaba dang hap hapoh u pud u sam ka Lapangap.

Shuh shuh u la iathuh, ki nongshong shnong ki la register ki jaka ki puta ki pynthor ki lyngkha bad ka JHADC bad kumta u khmih lynti ba ka JHADC kan ieng ban iada ia ka hok jong ki nongshong shnong jong ki.