Kynnoh iaknieh jaka ka balang Katholik bad ka longkmie ha Pasyih pynjari 144 CrPC ka bor district WJH

Syllad | The Rising MeghalayaJanuary 26, 2023

Ka bor synshar district jong ka West Jaintia Hills District kala pynjari da ka kyndon aiñ section 144 CrPC ban tem iaka jingkynad haka shnong Pasyih hadien baka la don ka jingkynnoh iaknieh jaka hapdeng kawei ka longkmie bad ka Balang Katholik.

U District Magistor West Jaintia Hills District Bah BS Sohliya ula pynmih iaka hukum haka sngi Balang ban khang pyrshah ban ialum paidbah palat iaka san ngut.

Ka hukum ka khang pyrshah ban rung ha kane ka jaka kaba iaknieh kiba don iaka jingthmu ban shna ban pynbha iaka jaka.

Ka hukum kam shah ban leh kino kino ki kam ha kane ka jaka kiba lah ban ktah iaka jingpynneh iak shong shongsain ha kane ka shnong.

U District Magistor ula pynmih ia kane ka hukum hadien bala ioh iaka kaiphod da u Superintendent of Police, West Jaintia Hills District. Ka don ruh ka jingmudur ejahar kaba la mudui da u Ioanis SiangshaiChairman bad Secretary ka Balang Katholik ka Yoo Dkhar pyrshah iaka Burom Rymbai bad la kynnoh ba ka Burom Rymbai kala maham ryngkat da kaba pyndonkam iaki tiar katba ki dang pynkhreh ban pynbha iaka madan na ka bynta ban lehkmen 100 snem ka balang haka 29 tarik Kyllalyngkot 2023.

Shuh shuh ka report kaba la ai sha u Deputy Commissioner, West Jaintia Hills lyngba u PI Court Jowai ban pyntreikam iaka kyndon aiñ section 107/145 CrPC ban teh khum ia baroh arliang mamla na ka bynta ban pynneh iaka shongsuk shongsain ha kane ka thain.

Ka kaiphod na ki Pulit ka ong ba lada iaid shakhmat ka jingpynkhreh ka balang Katholik ban rakhe iaka jingdap 100 snem ha kane ka madan ka lah ban ktah iaka shongsuk shongsain ha kane ka shnong.

Kawei pat ka report na ki ar ngut ki Additional Deputy Commissioner West Jaintia Hills ba kynthup iaka Kong EL Warjri bad u MA Challam ka ong ba ka don ka jingkynad kaba la ban ktah iaka shongsuk shongsain ha kane ka shnong na ka jingiaknieh ia kane ka madan.

Kane ka hukum kan treikam mardor tad haduh bala pynbna da kumwei.