Kynnoh ka BJP ba pynïaidkam bakla ïaka pisa T.16 klur tam ha JHADC

Syllad | The Rising MeghalayaNovember 22, 2019

JOWAI: Ki lai ngut ki MDC jong ka Bharatiya Janata Party (BJP) ha Jaiñtia Hills Autonomous District Council (JHADC) kila rai ban ujor sha ka Niti Aayog halor ka kynnoh pynïaid kam bakla ïaka pisa T.16 Klur tam kaba theh jingïarap ka sorkar kmie lyngba ka Special Assistance Grant (SAG) na ka bynta ban theh haki kam pynroi haki shnong ba bapher bapher hapoh u pud u ang jong ka konsil, pynban la kynnoh baka Executive Committee kaba ïalam u ma Thombor Shiwat, Chief Executive Member, JHADC kala pyndonkam ïa kane ka pisa ha ban siew tulop, pension ïaki nongtrei jong ki konsil.

Kine ki MDC jong ka BJP ba kynthup ïa u ma Lakhon Biam, Dawan Lyngdoh bad u Krison Langstang kila byrthen ban ujor bad pynsgew sha ka Niti Aayog halor ka jingpyndonkam bakla bad ïaid lait ïaki kyndon aiñ jong ka Niti Aayog halor ban pyndonkam ïaka pisa kaba da ki phew klur.

“Kane ka Executive Committee kaba ïalam u ma Thombor Shiwat ha JHADC kala ïaid lait ïaka kyndon aiñ jong ka Niti Aayog bad kiwei kiwei ki aiñ ban pyntreikam ïaka pisa bad kalong kaba beaiñ namar ba kane ka pisa ym shym la mang naka bynta ban siew tulop,” la ong u Ma Lakhon Biam.

“Naduh u Lber (March) 2019, ka Executive kaba ïalam u Ma Thombor Shiwat kala ïoh pisa T.167265000/- na ka skhim SAG bad T.16.50 klur la pyniaid kam sha ka Tulop jong ki palat 1400 ngut ki nongtrei ka konsil bad ban siew ïaka pension,” la ong u ma Lakhon.

“Watla kane ka pisa la pyndonkam na ka bynta ka tulop, hynrei kaba Tulop kaba ki baroh ki nongtrei ki dei ban ioh ka dangsah sa 5 bnai bad u bnai Naiwieng ruh ula jan kut. Kane ka buh ïaka konsil haka jingma namar ba mynta ka konsil ka don haka jinghiran ka pla tyngka bad ym tip kaei ka ban jia nangne shakhmat,” la kren bynñiaw u ma Lakhon Biam.

Halor kane ka jingpyndonkam bakla iaka pisa SAG, “Ngin leit ban ujor sha ka Niti Aayog, khnang ba ka pisa kaba dei ban poi sha ki kam pynroi kin leit sha ki kam pynroi,” la ong kine ki lain gut ki MDC BJP da kawei ka sur.