Kynnoh ka HNLC ba ‘Blackmail’ u CEM ka KHADC ia u Syiem Sohra halor ka Majai

Syllad | The Rising MeghalayaJuly 12, 2024

Ka seng Hynniewtrep National Liberation Council (HNLC) ha ka 11 tarik Naitung ka la kynnoh ia u Chief Executive Member (CEM) ka Khasi Hills Autonomous District Council (KHADC) u Bah Pyniaid Singh Syiem halor ka jingbyrngem ban thad ia ki kam jong u Syiem ka Hima Sohra (Blackmail) da kaba khyllie biang ia ka notification ban pynduh ai jingithuh ia ka Majai kum ka ‘Raid.’

Ka HNLC ha u kyrwoh lyngba u General Secretary-cum Publicity Secretary u Bah Sainkupar Nongtraw ka la ong, “Ka jingkhyllie biang ia ka notification ban pynduh ai jingithuh iaka Majai kum ka ‘Raid’ ka dei ka dak kaba shai kdar ba u Syiem Sohra u la shah maham bad shah byrngem ha u CEM.”

“Ka jingdawa jong u CEM ban aiti lut ia baroh ki dulir jaka jong ki bar jylla ha Majai la iohi kum ka kamkai sain hima. Ha ka jaka ban pynleit jingmut beit thik halor ka Majai, kan bha palat lada pan ruh ia ki dulir jong ki bar jylla ha Ichamati” u la ong.

U Bah Nongtraw u la ong ba u CEM u dei ban bthah ruh ia kiwei pat ki HIma bad ki Syiem ba kin aiti ia ki dulir ki jaka puta jong ki bar jylla kiba shong ba sah ha ki jaka jong ki riewlum, bad lada ka long kaba donkam ban kyndang ruh syndon ia ki baroh. Da kaba leh kumne, ngin shem ia ka jingshisha ia ka jingaiti ka jong phi na ka bynta ka jaidbynriew.

“To pyni sha ki paidbah ka Meghalaya ba ki District Council ki mihkhmat ia ka Sorkar jong ka ain, ym ka Sorkar jong ki briew. Ka jingpulom jong ki District Council kumjuh ka Sorkar Jylla  ban weng ia ki jingeh halor ka Them Metor ka la shu iai bteng ha ka jingpynsahteng,” u la bynrap.

Nalor kata u Bah Sainkupar u la ong ba ka jingkylli kaba mih ka long ba hato ka jingpyndam biang ia ka Majai kum ka Raid kan don jingktah ne em ia ki nongshong shnong bar Jylla. “Hato kin hap ban mih noh na Majai? Ka long kaba thamula ba ki bar jylla ki la jied ban ialehkmen da kaba pynbthei bom pataka halor ka jingpynbna jong ka District Council ban pynim ia kane ka notification.

U Bah Nongtraw u la kynnoh ruh ba haba u Syiem u la kyntait ban ai ia ka bhah kaba bun sha u CEM, kumta ruh u la pynmih ishu halor kane ka phang khnang ban blackmail ia u Syiem Sohra.

“U Bah Pyniaid u la pyndonkam ia la u jong u manager bad katto katne ki nonglum pisa ban pyndonkam bakla ia ka bor kaba u don kum u CEM. U la lum pisa da lade na ki tyllong bapher bapher. Nga tharai u Bah Pynshngain N Syiem, Dy.CEM u tip ia kane ka kam katba kiwei pat ki dkhot ka Executive Committee (EC) kim don jingtip ei ei,” kynnoh utei u nongialam ka HNLC. “Mynta ka Majai ka long kum ka jaka pdeng na ka bynta ki kam khaii pateng hapoh East Khasi Hills bad ka dei ruh u sohpdung na ka bynta ki katto katne ki riewsain pyrthei bymman ba kin ioh shim kabu,” u la bynrap.

“U Bah Pyniaid u dei tang u briew uba dang shu wan shen, uba la mih na ka syrngiew ka karkhana dieng u kpa jong u, u bym don jingtip ei ei shaphang ka kam sain pyrthei,” ong u Bah Sainkupar.

Haba pynpaw ba ka HNLC kala iakhun ban pynioh laitluid ia ki paidbah bad ka nongiada ia ka Bri u Hynniewtrep da ki phew snem, u Bah Sainkupar ula ong “Phi long thik kum u Captain William A Sangma bad ka Indira Gandhi, kiba dang shu lap ia ka Meghalaya hynnin ka sngi”.

Shuh shuh u la ong ba ia ka kyntien ‘ieid Jaidbynriew’ la shu pyndonkam bakla kumba la pyndonkam bakla ia ka ain da ki riew sain pyrthei ba bamsap. Ka jaidbynriew jong ngi ka la shah bishar bym hok ha ki kti jong ka sorkar Jylla bad ka Sorkar Pdeng.