Kynnoh ka HNLC ba ka jingkyntait ia ka show cause u nongiasaid ain ka dei ka jingthmu sain pyrthei

Syllad | The Rising MeghalayaMarch 24, 2025

Ka Hynniewtrep National Liberation Council (HNLC) haka 23 tarik Lber ka la kynnoh ba ka rai ba dang shen jong ka Unlawful Activities (Prevention) Tribunal ban khanglad ia u nongiasaid ain jong ka u Bah Fernando Shangpliang ban ujor ia ka show cause na ka bynta ka seng ka pynpaw ia ka jingthmu sain pyrthei jong ka Sorkar India bad ka Sorkar ka Jylla Meghalaya.

Ha u kyrwoh ka Seng HNLC lyngba u General Secretary cum Publicity Secretary u Bah Sainkupar Nongtraw ka la ong ba ka HNLC ha ki sienjam kaba dei hok katkum ka lynti synshar paidbah ka la pyrshang ban tynjuh ia ka jingniew beain ia ka seng kum ka kynhun kaba beain.

“Hynrei, wat hadien ka jingbud ia ki kyndon jong ka ain, ki bor treikam kiba kam ban bat ia ka hok ki la shah pyndonkam kum ka atiar ban pynsngap jar ia ka jingialeh ka jong ngi. Ka jingkyntait jong ka Tribunal ban pdiang ia ka jingmihkhmat u nongiasaid ain jong ngi kam dei kaei kaei ruh hynrei ka jingpyrshang ban kyntait ia ka sur kaba dei hok jong u Hynniewtrep ha ri kaba ki khot ka synshar paidbah. Kam don satia ka jingbishar hok ia ngi katba ngi dang hap hapoh ka lama jong ka ri India,” ka la ong.

“Kane ka jingleh jong ka Tribunal ka dei ka jingpynkhein ia ka lynti jong ka ain kaba la pruid dak ha ka rukom halor ki kam bishar khadar hapoh ka ri India. Ka iuhroit ia ka nongrim ba la pdiang da ka pyrthei halor ka jingbishar kaba hok, ka pynkylla kamkai ia ki kam bishar hok kaba iadei dur bad ki iingbishar Kangaroo kaba la la batai lypa ia ka rai bad ka hok ka dei tang ka jingphohsniew. Kaba kum kane ka jingleh ka pynpaw pyrthei ka pynpaw ba ka Tribunal kam dei kaei kaei ruh hynrei ka atiar sain pyrthei kaba la pyndonkam tang na ka bynta ban pynduhjait ia kiba ialeh pyrshah ia ka jingsynshar jong ka ri India ha ka bri u Hynniewtrep,” ong u Bah Sainkupar.

Haba pynpaw ba ka Sorkar India bad ka Sorkar Jylla ki la dap ban aiti ia la ki jong ki affidavit, une u nongialam ka HNLC u la ong, “Hynrei, haba ka HNLC ka pyrshang ban jubab da ka lynti jong ka ain, la khang pynban ia ka lynti. Kane ka sienjam ka pynpaw ia ka jinglong ba arsap jong ka ri India kaba ialap ia ka synshar paidbah hynrei kaba pyni pat ia ki kam kum ha ka por jong ka jingsynshar donbor ka ri Bilat. Kane sa shisien pat ka pynshisha ba ka jingthmu jong ka sorkar ka long ban bteng halor ka jingbat jubor ia ka bri Hynniewtrep ha ka jaka ban iaid ha ka jingbishar kaba bok.”

“Wat hapdeng kine ki jingpynkylla sain pyrthei hynrei ka HNLC ka dang iai kut jingmut skhem ban ia tynjuh halor ki jingkynnoh bym bok pyrshah ia ka. Ka jingshim bishar ka ban long ha ka 9 tarik Iaiong ha Guwahati, Assam kan dei ka por kaba kongsan bha ban pynpaw pyrthei ia ki kam thok bad ki jingkynnoh bym don nongrim jong ka Sorkar India. Ka jingialeh ka dang jngai ban poi sha kaba kut. Ngin ym sngap jar,” bynrap u nongialam ka HNLC.