Kynnoh ka HNLC ba kem ki pulit ia u nongialam ka HNYF halor ki jingkynnoh bym shisha

Syllad | The Rising MeghalayaMarch 11, 2024

Ka Seng kieng atiar Hynniewtrep National Liberation Council (HNLC) haka 11 tarik Lber, ka la kynnoh ba ka Tnat pulit ka Jylla ka la kem ia u nongialam ka Seng HNYF u Bah Tarson Lymba halor ki jingkynnoh ki bym shisha ha kaba iadei bad ka jingjia pynbthei bom IED kaba la jia hapoh Them Iew Mawlong.

Watla katta, ka HNLC kam shym la shim ia ka jingkitkhlieh halor katei ka jingjia bthei bom kaba la jia ha ka miet jong ka 9 tarik mynta u bnai. Ka HNLC ka la ong ruh ba uwei pat uba la shah kem ia uba la tip kyrteng kum u Bah Ebakordor Nongpluh u dei u nong aijingtip jong ki pulit ne informer.

Na ka liang u Bah Saiñkupar Nongtraw General secretary cum Publicity secretary jong ka Seng u la ong, “Ka HNLC ka pynrem jur halor kane ka jingshah kem u dkhot ka HNYF u Bah Tarson Lymba halor ki jingkynnoh bym shisha halor ka jingdonkti ha ka kam pynbthei bom kaba la jia ha Them Metor. Kane ka dei ka juh ka buit rim ba tad dor ba la pyndonkam da ki pulit haba kim lapksai da kaba shu kem naphang. U Tarson u la don bynta tang ha kaba iadei bad ka jingiakren iasuk bad um dei ruh u dkhot ka seng lane u nongkyrshan ka HNLC. U dei tang u nongsynran ia u Bah Sadon Blah president ka HNYF uba dei ruh u ksiang ha ka jingiakren iasuk.”

“Lada ki nongpyniasuk lane uba ia don bynta ha ka jingiakren kin ngat ha ki jingshah banbor bad shah kem ha ki bor pulit, mano na ki kynhun kiba ia don bynta ki ban shaniah ia kane ka rukom treikam lane ia ka sorkar lada ka HNLC ka wanphai biang sha ka jingiakren iasuk,?” U la buh jingkylli.

Nalor kata u Bah Nongtraw u la kynnoh ruh ba ka long kaba thikna ba ka sorkar ka la shu pynngat bad pyniap ia u Bah Christerfield Thangkhiew uba dei u general secretary barim jong ka seng. “Ka long ka jinglehrain ia ki riewsain hima ka Meghalaya ki ba dei ban long ki nong iada ia ka democracy, hynrei mynta ka Meghalaya ka la kylla long ka plutocracy bad ba la pyniaid tang da ki plutocrats.” U la ong.

Shah kem arngut kynthup u nongialam ka HNYF halor ka jingbthei bom ha Iew Mawlong

Da kaba pynpaw ba ka Seng HNLC kam long pyrshah ia ka jingsuk, u Nongtraw u la ong, “Ngim dei ngi nongbanbor hynrei ki nongshah banbor. Lada don kiba knieh ia ka jaka jong phi, hato kin ioh ia ka jingsuk? Naduh ki 76 tylli ki snem, ka India kam pat ju ioh mad ia kano kano ka jingsuk lane ba kan ioh ia ka. Ia ka jingsuk yn ym lah ban tei lyngba ka jingbym pyniaryngkat, ka jingbanbor, ka jingthombor.

“Nga la pule ia ka histori jong ka Bharat.. ka Histori ka jong phi, bad ka pynpaw ba phi dei u nong pyniap briew, u nong rungtuh, nonghiar thma, u nongtuh, u nongrahbor, u riew shukor, u nongleh beijot bad u riewbymman. Nalor kata phi la pynkhein ruh man ka por ia ki jingiateh ha baroh ki princely state. Ka long markhongpong ia phi ban ialap halor ka jingsuk bad ki kam bym iaumsnam, ka jingbishar hok bad ka synshar paidbah,” u la ong shuh shuh.