Kynnoh ka HNLC ba pyniasoh jubor ka tnad pulit ia u Sromwell Mawdoh bad ka seng ba u khreh iakhun elekshon MDC

Syllad | The Rising MeghalayaSeptember 23, 2024

Ka Seng Hynniewtrep National Liberation Council (HNLC) ka la kynnoh ia ka Tnad pulit ka Jylla halor ka jingpynjah burom ia u Bah Sromwell Mawdoh hashwa ka elekshon MDC ka ban wan da kaba pyniasoh ia u bad ka Seng.

Kane ka jingpynpaw jong ka HNLC ka la wan long ruh khyndiat sngi hadien ba u Bah Sromwell u la shah kem noh na ka iingsah jong u na Umpling, Shillong halor ka jingkynnoh donkti ha ki kam lum pisa beain na ki heh spah kiba la ioh pdiang ia ki shithi dawa pisa na ka seng HNLC.

Na ka liang ki pulit ki la pyntip ba u Sromwell uba dei u headmaster barim jong ka skul Laishnong secondary school, Mawlangsu, West Khasi Hills, u la phla ba u dei u Treasurer jong ka HNLC.

Da kaba kyntait ia kane ka jingkam jong ki pulit, u General Secretary cum Publicity Secretary ka HNLC, u Bah Sainkupar Nongtraw u la ong, “Ka jingkynnoh jong ki pulit pyrshah ia u Bah Sromwell Mawdoh ka dei ka bym lah ban pynshisha, bad ngi kyntu ba kin pynpaw ia ki sakhi satar kiba biang ban pynshisha ia ka jingkam ka jong ki halor ka jingiadei ka jong u bad ka seng HNLC.”

“Nga la ioh jingtip na ka Facebook post lem bad kiwei pat ki tyllong khubor ba u Mawdoh u la pynpaw ia ka jingdon jingthmu ban iashim bynta ha kane ka elekshon MDC ka ban wan. Hynrei na ka liang ka tnad pulit ka kwah ban pyniap bad ban pynjah burom ia u lyngba ki lad pathai khubor ban pyni ia u kum u briew uba sniew hashwa kane ka elekshon. Kine ki jingleh jong ka tnad pulit ki la pynsniewdur bad pynjah burom shibun ia ka long ka man jong u Bah Sromwell da kaba pyniasoh jubor ia u bad ka seng HNLC,” ong u Bah Sainkupar.

U la ong ruh, “Ka Seng ka kwah ban pynshai ba u Sromwell um dei satia u dkhot pyndem wait ka HNLC …hynrei ha ka jingshisha u dei u dei u dkhot jong ka Seng uba la shah kem noh ha u bnai Jylliew 2015. Ha ka sien kaba ar ba la kem na ka iingsah jong u ki pulit ki la pynngat ia u kum u Over Ground Worker (OGW) jong ka HNLC.”

Nalor kata u Nongtraw u la ther tyngeh ia ka tnad pulit namar ki jingpyrshang ban leh kum ki kynhun runar da kaba thmu ban pynngat pyrshah ia ki riew shimet kiba dei ki khynnah samla ha ka kyrteng jong ka ain. Hynrei ha ka jingshisha ki dei ki kynhun beain, ki nongthok nonglamler bad ki nongpyniap briew.

Une u nongialam ka HNLC u la ong ruh, “Ha u snem 2010 haba u Paristone Pakyntein@Pudo u la shah kem noh ha ki BSF, ka heh pulit ka Jylla ka Jyoti Wahlang ka la leit ban iakynduh ia ki heh BSF ban kyrpang ia ki ba kin aiti ia u Pakyntien sha ki pulit. Ka la kyntu ruh ia ki BSF ba kin ym ai kano kano ka jingpyntip sha ki lad pathai khubor, hynrei ba ka tnad pulit kan leh hi ia kaba donkam namar ba ka dei kaba la tbit ha ka kam ai musli musla ha ryngkat ki 12 jait ki jingber ba la pynkhreh lypa. Namar kane ka jingtbit ai musla, lah ban ong ba ka tnad pulit ka lah ban pyndonkam ia kino kino ki buit sianti, kum ki kam iasylla ban pyntroin ia kano kano ka kynhun ne ki riew shimet ha kapor ba ki shah kem.”

“Ha ka por jong u Emanuel Suchen ha Mawiong, u Justice T Vaiphei u la leit iakynduh ia u ban tohkit bniah ha kaba iadei bad u Bah Che halor ka jingkynnoh donkti ha ka jingjia bthei bom IED ha Jaintia Hills bad ha Laitumkhrah. U Suchen u la pynthikna ha u Vaiphei ba u Bah Che um don bynta ei ei halor kitei ki jingjia,” u la ong.

“Hadien kane, 3 ngut ki Myntri kiba kynthup ia u Conrad Sangma, Bah Prestone bad u Bah Lakhmen Rymbui kila leit iakynduh ia u Suchen ha Mawiong bad kila kylli jingkylli ia u ha kaba iadei bad ka bynta jong u Bah Che halor ki jingjia pynbthei IED. Wat haba u Suchen ula bteng ban kyntait, kitei ki myntri kila pynbor ia u ban ai ia ki jingphla kiba thok ban pynngat ia u Bah Che. Kum ka bainong halor ka jingkohnguh ka jong u, kila kular ban ai kam bad ban ai jingiarap da ka pisa. Kane ka la paw shai na ka jingpyrshang ka Star Cement ban iakren bad u Emmanuel ban tyrwa ai kam ia u, ba ka don ka jingiadei kaba iajan bha hapdeng ka sorkar jylla bad ka Star Cement” la kynnoh u Bah Sainkupar.

Shuh shuh u la ong ba hadien ba u Emanuel u la pyndem noh ia lade, la ialam noh ia u sha Mawiong, ha kaba u SP Jagpal Singh u la wan poi bad ka byrngem ban shim ia ka jingim jong u Emanuel ha kaba u la thombor ruh ia u kat haduh ba un da mynsaw jur. Hadien lai bnai ba la shah set ha Mawiong, ka NIA ka la pynkynriah noh ia u na ka phatok ha Jowai sha Delhi na ka bynta ban pynlong ia ka jingtohkit ha kaba u la mad ia ka jingshah pynshitom kaba jur bha. U Emanuel u la don ia ki dak mynsaw ha ki bynta jong u ryndang, ki shynriahkti bad u syngkai. Ia mynta la pynphai biang ia u sha ka HNLC bad u dang don hapdeng ka jingshah sumar bad ngi kyrmen skhem ba un ioh noh kloi ia ka met kaba koit ba khiah.”

U Emanuel Suchen, udei u dkhot ka HNLC jong ka snem 2003, udei uba don ia ka discipline bad uba tbit ha ki kam pynbthei bad uba kloi ban trei bad aiti na ka bynta ka dawbah jong u Hynńiewtrep, ong u Bah Sainkupar.