Kynnoh ka HNLC ba pynthut ka Sorkar ia ka jingiakren iasuk

Syllad | The Rising MeghalayaAugust 5, 2024

Ka seng Hynniewtrep National Liberation Council (HNLC) ka la kynnoh ia ka Sorkar halor ka jingpyrshang ban pynthut ia ka jingiakren iasuk kaba la iaid baroh shikatta.

Ka seng HNLC ha u kyrwoh ba la pyllait haka 4 tarik Nailar da u General Secretary Cum Publicity Secretary u Bah Sainkupar Nongtraw ka la ong, “Ka HNLC ka kwah ban wad ia ki lad ki lynti ban weng noh ia kane ka jingeh kaba la don 77 snem mynta, hynrei na ka liang ka sorkar ka la pyrshang ban pynthut ia ka jingiakren iasuk.”

“Ka long kaba shisha ba ha kaba sdang ngi la iasaid ban don ki jingiakren hapoh ka kyndon jong ka riti synshar ka ri India, hynrei hadien ba ngi la pyni ia ka jinglong jemnud, ka sorkar kam shym la leh kumta. Ko sorkar India, phi la matlah da ka jinglong halor jong ka niam bad bor shipai jong phi. Hynrei, ngi ki Hynniewtep kiba shah banbein ngin ieng pyrshah ïa ka rukom synshar phareng jong phi. Phin sa sakhi ba ngim dei shuh kiba la iap ha ki jingmut jingpyrkhat, ki briew jong ngi kin sa mihpat ban pyllait na kane ka rukom synshar bad ialeh pyrshah ia ka sorkar ba donbor jong phi. U Wickliffe, u Tirot Singh, u Kiang Nangbah bad u Bah Cherish lehse ki la iap bad ki la jah noh, hynrei ki jingmut jingpyrkhat jong ki ki dang iai im,” ong u Bah Sainkupar.

U la ong ruh, “Ka HNLC kan iap tad ynda la iap ki jingmut jingpyrkhat jong ki ha ka sain hima sima. Phim pat lah ban pyniap ia ki jingmut ban pyniakhlad noh na ki ne na ngi. Ha ka sain hima sima bad ha ka ioh ka kot, ngi long kum ki thapbawa. Wat la ka shim por katno katno snem ruh, ka HNLC kan pynkhih marwei ia ka jingthain.”

Une u nongialam ka seng HNLC u la ong ruh ba ia ka kyntien ‘ieid Jaidbynriew’ la pyndonkam bakla kumba la pyndonkam bakla ia ka ain da kitei ki nongialam sain hima bamsap. “Ka Jaidbynriew jong ngi ka la mad ia ki kam jingshah leh bymhok ha ka kti jong ka sorkar jylla bad ka sorkar pdeng. Kumta ka HNLC ka kyntu ia ki nongialam ka Bri u Hynniewtrep, ki nonghikai, ki riewstad riew shemphang bad ki nongthoh kot ka Bri u Hynniewtrep ban ieng ha ka liang jong ka jingshisha bad ka hok.”

“Nga sngew lyngngoh balei ki briew kiba jied ia ki riewsain hima jong ki ban mihkhmat ia ki ha Secretariat bad Assembly ki tieng ia ki. Ka sorkar bad ka tnad treikam jong ka ki la pynpulom ia phi. Lada ki riewsain hima kiba phi jied ha ka kam ki pynpulom ia phi, phi dei ban teh ia ki kti bad ki kjat kum ki sniang kiba jakhlia, pyntyllun ia ki ha surok, ne sdien ia ki ha u dieng kum ki mrad. Phi dei ban sangeh noh ban long tang kum ki pawn ha ka jingialehkai board, ki kada kiba jakhlia, ki briew kiba pyndem. Phim dei ban thiah ha la ka jong ka hok. Kine ki riew sain hima kiba phi la jied ki dei ki khniang, ki nongkjit snam  kiba leh thok bad leh shukor ia la ka jong ka shnong ka thaw. Ki dei ma ki kiba shukor ia ka lama bad ia ki riti synshar khadar. Haba u nongialam u die ia la ki jong ki briew, udei ban siew da ka dor halor kane. Ngi dei ban ai nuksa khnang ba u nongwan uba hadien un burom ia ki paidbah bad leh ia ka mon u paidbah,” ong u Bah Nongtraw.