Kynnoh ka JSU ba bret ñiut pathar ka Jowai Municipal Board

Syllad | The Rising MeghalayaMarch 8, 2021

Ka Jaiñtia Students’ Union (JSU) War Jaintia Circle kala kynnoh ba Jowai Municipal Board (JMB) kala bret pathar iaki ñiut ba kala kit na sor Jowai sha ka jaka bret niut ha Mynkjai, kaba don harud ka surok bah Dawki Amlarem Jowai.

U Eddy Kery Pohtam President ka JSU War Jaintia Circle bad u Wansalan Patwet, Vice President ka JSU Jowai Circle kila kynnoh ba haka jingjurip jong ki haka sngi Nyngkong kila lap tyngkrein ba ki kali jong ka JMB kila bret pathar iaki ñiut kat shaba lap ba shem.

“Kane ka surok bah ka dei ruh ka surok ba kongsan tam iaki nongleit nongwan sha War Jaintia bad kane ka jingleh torti ka Jowai Municipal Board kala pynsniewdur iaka jinglong jingman ka sawdong sawkun ka mariang. Ka thain war mynta kala khring ia kiba bun ki nongwan jngohkai ban leit kai sha ki jaka ba paw kum ka Krangshuri bad Wah Umngot, hynrei ka jingtorti ka JMB kala wanrah pynban iaka jngjah burom,” la ong ka JSU.

Ka JSU kala pynpaw ka ngewkhia kaba jur namar ba mynta ba la jan poi ka aiom lyuir kan sa don ka jingktah ia ka Wah Myntdu naka jingtuid ki nuit bad ki jaboh jabaiñ ba har rukom kaba ktah ym tang ia u briew, hynrei iaki mrad ki mreng. ka JSU kala dawa na ka JMB ban pynkhuid mardor ia kine ki jaboh bad ban bret ha ka rukom kaba dei bad ban bret.