Kynnoh ka KHNAM ba dei ka buit politik ka Sorkar ban pynjlan ia ka elekshon MDC

Syllad | The Rising MeghalayaAugust 17, 2024

Ka Khun Hynniewtrep National Awakening Movement (KHNAM) ha ka 16 tarik Nailar ka la kynnoh ia ka Sorkar Meghalaya Democratic Alliance (MDA) halor ka jingpyndonkam da ki buit sain hima ban pynslem ban pynlong ia ka elekshon sha ki artylli ki Autonomous district Council (ADC) ha Khasi bad ka Jaintia Hills.

Haba kren sha ki lad pathai khubor, u Working President ka KHNAM u Bah Thomas Passah u la ong, “Ngi pyrshah jur ia ka jingthmu jong ka Sorkar ban nangpynjlan shuh shuh ia ka elekshon sha ki ADC. Kane ka dei tang ka buit sain hima kaba la shim da ka Sorkar ban bat jubor ia ka bor ha ki ADC.”

Na ka liang ka KHNAM ka la shim ruh ia ka rai ban thoh sha u Lat ka jylla u CH Vijayashankar ba un tuklar mardor ha kaba iadei bad kane ka phang.

“Ha ka riti synshar paidbah, ka dei jong u paidbah, da u paidbah bad na ka bynta u paidbah, hynrei mynta (ha ki ADC) lah kumba 6-7 bnai ba la dep, ki MDC ki dei jong ka MDA, da ka MDA bad na ka bynta ka MDA namar ka samoi treikam jong ki MDC ka la kut noh ha u Rymphang 2024,” u la ong.

Haba kynnoh ba kane ka jingpynjlan ia ka samoi treikam jong ki ADC ka dei ka buit ban synshar donbor da ka Sorkar, u Bah Thomas u la ong, “Ngi pynpaw ka jingsngew bynniaw kaba jur ba ka Sorkar Jylla ka nud ban pyndonkam bakla ia ka bor jong ka da kaba pynjlan beain ia ka por treikam jong kine ki ADC.”

“Ki MDC kim dei satia ban shim tulop namar ka samoi treikam jong ki ka la kut naduh u bnai Rymphang mynta u snem. Ka jingbteng ban shim tulop ka long kaba beain,” u la ong. “Kumta ngi la rai ban thoh mardor sha u Lat ba un tuklar halor kane ka kam namar ba ka la shim noh ia ka hok jong ki paidbah ba kin jied ia ki iing kiba thymmai ha ki ar ADC da kane ka sorkar ba mynta.”

Nalor kata u Bah Thomas ula ong ruh ba kam don satia kano kano ka jingjia kaba kyrkieh ne kano kano ka mat ia kaba ka Sorkar Jylla kan rai ban pynjlan ia ka por treikam jong kine ki artylli ki ADC.

Haba kylli u nongialam ka KHNAM u la ong, “Na ka liang Lat u la mynjur ia ka jingtyrwa ban thaw Delimitation Committee hynrei ki don bun tylli ki shnong kiba la pyrshah. Mynta, ka mih ka jingkylli hato ka Delimitation Committee ka lah ban pyndep iaki kam haka por ba lyngkot.

“Ngam kynnoh satia ia ka delimitation committee namar la kyntu ia ki ba kin leh ia ka kam kaba khia tang ha i por ba khyndiat. Kam dei kaba suk. Kumta, kane ka dei tang ka buit sain hima ba la pyntreikam da ka Sorkar Jylla ban bat jubor ia ka bor ha ki ADC,” ong u Bah Thomas.

Shuh shuh u Bah Thomas ula pynpaw ba u sheptieng ba ka Sorkar kan pynlong ruh ia ka mat kaba iadei bad ka jingthmu ban pynkylla ia ka Sixth Schedule jong ka riti synshar jng ka ri India kum kawei pat ka daw ban pynjlan shuh shuh ha ka ban pynlong ia ka elekshon sha ki ADC.